~अनन्त निरौला~
एक दिन
सानो यात्रामा
संगै हिंडियो
भला कुसारी गरियो
दालमा नुन कम लागेको कुरा भो
अस्ति भुटेको करेला
मिठो भा’को चर्चा भो।
अलिकति देवकी दिदीको कुरा भो
उनको व्यवहार नमिलेको चर्चा भो
आफ्नोपन नदेखिएको कुरा भो
नयाँ बुहारी ल्याएपछि
भेटघाट गराउन ल्याउनुपर्ने हो
नल्याएपछि अब सम्बन्ध
पातलिने हो कि भन्ने चर्चा भो।
कपटीपनले ग्रसित
हाम्रा कान्छ बा का
छोरा बुहारी र तिनका छोराछोरीहरु।
फाइदा हुनेछैन भने
आफ्नो कुरा छिरिक्क नचुहाउने।
अलिकति उनिहरूको
घोसेपनको कुरा भो।
कपाल जिङरिङ्ग देखियो
पुछार काटेर मिलाउनु पर्ने
राति अनुहारमा लाउने क्रिम
सकिन थालेको छ किन्नु पर्ने
अलिकति उनको श्रृङ्गारको कुरा भो।
अनि अलिकति
मेरो कविता र त्यसका पात्रहरुको चर्चा भो
एक दिन हाम्रो सानो यात्रामा
यसरी नै माया पिरतीको कुरा भो
यसरी नै माया पिरती साटियो।
(स्रोत : रचनाकार स्वयंले ‘Kritisangraha@gmail.com‘ मा पठाईएको । )
