~रामेश्वर राउत ‘मातृदास’~
हर्षैहर्ष वर्षा होस् अनेक नयाँ वर्षमा,
सुख शान्ति समृद्धि फैलियोस् जीवन कर्षमा
सेवा भाव जागृत होस् हरेक पल अंशमा,
अनन्त अमृत बर्षियोस् वशिष्ठ कुल वंशमा ।।
झमक्क झम्के–साँझमा प्रसन्न जून लम्किऊँ,
प्रखर पौरख पसिना समुन्नत सृष्टि चम्किऊँ
हिमाल शैलपुत्री यी नेपाल आमा हँसाऊँ,
अमर दिव्य पुरमा परमात्मा वास बसाऊँ ।।
सुरम्य रमण रहर भो सुरभी शैलीशिरमा,
को पर्न खोज्छ विरही विरक्त लाग्ने भिरमा
रवि शशि तारापुञ्ज नृत्याङ्गना नागर,
उमङ्गका छालमा मङ्गल हुन् सातैसागर ।।
उनान्चास मरुदगणका आकाश देउसी भैलो भो,
सभ्यता सृष्टि शिरमा आरम्भ आँगन नेपाल यो
एऽ आमा लौ न उघार ज्योतिको दैलो घरक्क,
बिर्सेर जाने बैगुनी फर्केर आउन् फरक्क ।।
– वशिष्ठधाम, निर्झर दिलचेत, सिन्धुबस्ती
(स्रोत : घटना र विचार राष्टि्य साप्ताहिकको इन्द्रेणी)
