~नोगेन हांग~
झण्डा एकै हो भन्दछौ
देश एकै हो भन्दछौ
सरकार पनि एकै हो भन्दछौ
तर म कणाली बासी
के मा बरबरी देख्दछौ म संग ।
किनेर पाएको
नागरिकता र पासपोर्ट बोकेर
म छोरो भएको भूमिका निभाउन
कसो कसो इण्डिया देखी
अरब सम्म पुग्दछु
मलामीको लाममा
चेलीबेटीको काँधमाथी लास हेर्ने
मन त कहाँ छ र म संग पनि ।
तिमीले आफ्नो
आँगन सम्म बाटो खन्यौ
तर कणाली लाई जोड्न सकेनौ
र भन्न छोड्दैनौ
झण्डा एकै हो देश एकै हो ।
जब सम्म कणाली चिर्ने
सडकहरु जोड्दैनौ
तब सम्म दख्खिन बगीरहेको कणाली संगै
उतै बगीरहने छन
पुन्न बहादुर बिश्वकर्मा हरु ।।
-नोगेन हांग
November 8, 2008
(स्रोत : माइ संसार डट कम)
