~करूण थापा~
दुश्मनसँग सुख दुःख, आदान प्रदान चलेको छ ।
लैजाऊ नाउ मझधारमा, आज तूफान चलेको छ ।
बाँच्न गाह्रो भयो झन् झन् मर्न भने सजिलो भो
घर चल्न छोडेको छ, तर मसान चलेको छ ।
खडेरी छ छातीभित्र आँखा सिँचाई गर्न छाडे
अझै पनि पिरतीको, खेती किसान चलेको छ ।
बन्द भए मल्हम बेच्ने ठूला ठूला दबाई पसल
शराब बेच्ने साहुनीको, सानो दोकान चलेको छ ।
भगवानले दिन्छन् भन्छन् खै कसलाई के दिए र
मन्दिरमा मैले दिएँ, त्यसले भगवान चलेको छ ।
काठमाडौं
(स्रोत : फित्कौली डटकम)
