गजल : कुहिने पो हो की

~राकेश कार्की~

माया साँच्दा साँच्दै कतै कुहिने पो हो की
मुटु अठ्याउँदा अठ्याउँदै चुहिने पो हो की

दिन, हप्ता, महिना, साल सबै बितिसक्यो
खुशीयाली जन्मनु अघिनै तुहिने पो हो की

आँधी, बतास, असिनाले हिर्काउँछ घरी घरी
अगाडीको फूलको हाँगा जस्तै नुहिने पो हो की

पर बाँधेको आफ्नो बाछालाई टुलुटुलु हेर्दै
रोईरहेकी निरीह गौरी झैँ दुहिने पो हो की

2008-10-23
लस् एन्जेलस्

(स्रोत : साझा डट काम)