गजल : नाली तिर बग्ने मुलधार चाहिन्न

~मबि सिंह~

नाली तिर बग्ने मुलधार चाहिन्न
भीरबाट खसाउने सवार चाहिन्न

जिन्दगीको अंगार गाजल बनाएँ
काईदा जाने सोर्ह श्रृंगार चाहिन्न

ब्यथाले भरेको कथाको पात्र हुं
कुनै भुमिका या पुछार चाहिन्न

लुकी छिपी पनि आएकै छु म
संकेत दिए पुग्छ पुकार चाहिन्न

एकै थरि खाएर बित्यो जिन्दगानी
थुप्रो परिकारको आहार चाहिन्न

गाला मुसारेर हातमा धार लाउ
गला रेट्न अर्को हतियार चाहिन्न !