~अतित मुखिया~
झझल्को तिम्रो लगातार हुनु
जम्काभेटमा आँखा चार हुनु
नबोलीकन बाटो साटिनु
तिमी पूर्व म पश्चिम हाँकिनु ।
पाइला विपरित भएपनि
आँखा एकआर्कालाई पछ्याउनु
नजर नजरमा पर्दा एकाएक
नदेखे झैं दृष्टि सच्याउनु
चाहना अनौठो बहाना अनौठो
संयोग अनौठो त्यो भेट अनौठो ।
देख्दा अदेखा भै तर्कनु
पर पुगेर फेरी र्फकनु
झस्केर आफैसंग तर्सनु
बिस्तारै पाइलारोकी पर्खनु ।
नजिकपर्दा अफ्टेरो मानी
बोल्नैपनि अक्मकाउनु
जति टाढा भयो उतिनै झन
सम्झी सम्झी छट्पटाउनु
बिकट अनौठो निकट अनौठो
संयोग अनौठो त्यो भेट अनौठो ।
अतीत मुखिया
फूलबारी टोल, कोटेश्वर
(स्रोत : नारीदर्पण डट कम)
