~विनोदविक्रम केसी~
कुनै सरकारी पुस्तकालयमा भेटेको थिएँ मैले हत्याराको डायरी
डायरी मोटो छ महाभारतभन्दा मोटो
मान्छे मार्ने
लाखौँ तरिका
लाखौँ हतियार
(छुरीदेखि महँगीसम्म)
उल्लेख गरेको छ हत्याराले
आफूले मार्ने मान्छेहरूको
लामो सूची
तयार गरेको छ उसले
मिति र स्थानसहित
उसको सूचीमा छन्–
किसान÷मजदुर÷शिक्षक÷कवि÷पत्रकार
साना व्यापारी
को छैन उसको सूचीमा ?
उसको सूचीमा म छु
सेतै कपाल फुलेकी मेरी आमा छिन्
भातभान्छाबाहेक केही नजान्ने मेरी श्रीमती छे
राम्ररी बोली पनि नफुटेको मेरो छोरो छ
प्राइभेट कम्पनीमा काम गर्ने मेरी बहिनी छे
उसको सूचीमा
मेरा आफन्त छन्, छिमेकी छन्
मित्र छन्÷शत्रु छन्
को छैन उसको सूचीमा ?
यो देशको हरेक ‘ठूलो मान्छे’को हातमा
बिल्कुल त्यस्तै डायरी छ
अब कोसँग गुहार माग्ने ?
(स्रोत : हिमाल खबर)
