~जुगल भूर्तेल~
प्यारो छ हामीलाई नेपालै, किन बत्रु र जापान
जनप्रिय छन् नेता हाम्रा, प्रधानमन्त्री छन् विद्वान
बनेन सडक चलेन गाडी, तिनलाई के को बात
सुख’नि हुन्थ्यो, शान्ति’नि हुन्थ्यो नभए विदेशी हात !
प्यारो छ हामीलाई नेपालै, किन बत्रु र रूस
छन् कर्मचारी जनसेवक सच्चा, हेर्नै नसक्ने घुस
मन्त्रीगणको क्षमतालाई को दिन सक्छ मात
धारा’नि चल्थ्यो, बिजुली’नि बल्थ्यो नभए विदेशी हात !
प्यारो छ हामीलाई नेपालै, किन बत्रु र कतार
दल–बीचबीच छ प्रेम विलक्षण, साझ छ सरकार
सभासद् सबै मिहिनेती भन्दैनन् काममा दिनरात
संविधान’नि बन्थ्यो, सुरक्षा’नि हुन्थ्यो नभए विदेशी हात !
(स्रोत : हिमाल खबर)
