~राबत~
यो जमघट देखेर चकित छु अहिले
आफ्नै दुश्मनहरूको मीत छु अहिले ।
जब ढोका हालेँ, घरमै त्रसित थिएँ
ढोका फालेदेखि सुरक्षित छु अहिले ।
चल्दो रहेछ होडबाजी प्यारमा पनि
कसैको दिलमा मनोनीत छु अहिले ।
जति हाँस्नु थियो बच्चामै हाँसिसकेँ
हाँसोदेखि अब बञ्चित छु अहिले ।
आऊ, स्पर्शले मारेर जाऊ मलाई
दूबोमाथि अडेको शीत छु अहिले ।
भट्टीबाट निस्केपछि मुर्दा हुनेछु
के भन्नु छ भन, जीवित छु अहिले ।
(स्रोत : हिमाल खबर)
