~रेखा लोहोरुङ राई~
तिमी मात्र एक्लो हैन, निरा
आकाशमा हेर त
रातभरि जून एक्लै
दिनभरि घाम एक्लै
सदियौं देखि
पृथ्वी पनि त
एक्लै नै हो नि ।
तिमी मात्रै हो र
म नि एक्लै छु, आजकाल
अस्तिसम्म त
हरसाँझ जूनसँगै आउँथे
प्रभातमा उसरी नै
भन्थे, डेरा सर्दैछु
टाढै पुगेछन् कि, खै !
उता लुङ्वा पनि त
एक्लै हो नि
आक्कल झुक्कल
मोबाइलको रिङ्गले झस्काउँदो हो
बरु,
खर काट्दा
अलैंची गोड्दा
अम्रिसो छाँस्दा
एक दशक जेठो
सम्झनाले पिराल्दो हो ।
तिमी, लुङवारममा
यही समानता छ
सबैमा समता ।
रेखा लोहोरुङ राई
संखुवासभा, हालः काठमाडौ
(स्रोत : विश्वन्युज डट कम )
