गजल : यो मनमा तिमी नै

~दिव्य गिरी~

यो तनमा तिमी नै, यो मनमा तिमी नै
सधैँ सम्झनाको आँगनमा तिमी नै । -केदार शाक्य

छामेर हेर, मेरो यो छातीमा
मुटुको हरेक धड्कनमा तिमी नै ।

चौतारीको पीपल छहारीमा छु म
बिहानीको शीतल पवनमा तिमी नै ।

गाउँघर, सहरमा तिमी खोज्दै हिँडे
भेटेँ आराधनाको मधुवनमा तिमी नै ।

यो तनमा तिमी नै, यो मनमा तिमी नै
सधैँ सम्झनाको आँगनमा तिमी नै ।

टीकाथली-५, ललितपुर, काठमाडौं

(स्रोत : मधुपर्क २०६६ माघ)