~कमल प्रकाश पौडेल ~
लड्यालड्यौ गर्दागर्दै, देशमा मारमार भो
सोझा गाउँलेका निम्ति, गोली बन्दुक भार भो ।।
उच्च पदमा बस्नेहरू, आनन्दले खाइरा’छन्
क्यै नहुने निमुखालाई, दुईतिरै धार भो ।।
गर्न सक्नेले त गर्छन्, उनलाई केही भा’छैन
लुकाईछिपाई राख्नलाई, उनकै सरकार भो ।।
देशको ढुकुटीमा ढ्वाङ, विदेशमा घुम्दाघुम्दै
नैतिकताको परिणाममा, उही भ्रष्ट आचार भो ।।
बन्द भए हामीहरू, आँफैलाई मात्रै रैछ
मन्त्रीलाई त पजेरो र, रातो प्लेटको कार भो ।।
यात्रा गर्दा गाडीबाट, आधा बाटो हिड्नै पर्ने
गोली बोक्ने जङ्गलमा, जन्ता झाराझार भो ।।
–रचनाकालः–२०६२÷०९÷०२
(स्रोत : रचनाकारको ब्लगबाट सभार)
