~दिलिप दोषी~
एकतमास तिमीलाई हेर्दा, तारा रोएको कहानी लेख्छु ।
सिरानीमा नयनले रातभर, जिन्दगीको बिहानी लेख्छु ।
तिमी त बिरानो भएर गयौ, मेटिएन खै ! ती यादहरु ।
तिमीसँग बिताएका पलहरु, सोच्दै एक जवानी लेख्छु ।।
घुमेका ती चक्रहरुसँगै, तिम्रो मुहार अनुवाद हुँदा ।
मनमा लागेको चोटको, नमेटिने गरी निशानी लेख्छु ।।
निथ्रुक्क भिज्दा तिमी जाडोले काँपेको त्यो समय नियाल्दै ।
अनमोल त्यो क्षणमा भएको संवादकोे मिठो बानी लेख्छु ।।
यो सम्झिने मनलाई, नसम्झ भन्न पनि सक्दिन नि मैले ।
पातले छाँगो झैं अनवरत बगेका ती अाँशु ठानी लेख्छु ।।
भैगो ! अब धेरै लेख्दिन मनलाई दुखाउनु मात्र हुन्छ ।
जिन्दगी सुखमयसँग वितोस्, नसम्झनु पानी लेख्छु ।।
(स्रोत : सत्यतथ्य मासिक)
