कथा : एक्काइस नाघेपछि

~पुष्पराज गिरी~

त्यो रात उनीहरुसँगै भए एकै कोठामा। रविले Johana को मुलायम कपाल खेलाइरहेको थियो, अनि घरीघरी टाउको मुसारिदिँदै थियो। Johana को टाउको बिस्तारै रविको ओठतिर लम्कियो, दुबैका मुख परस्पर जोडिए।

एकाएकै Johana ले रविले कसिसकेको आफ्नो शरीरलाई फुत्काउँदै भनिन्- Otros 2 meses mas (अरु थप दुई महिना)। रविले केही बल नगरेको होइन, तरै पनि no tengo 21 anos, si tuviera 21 anos no podriamos hacer cosas sin sentido (म अझै २१ पुगेकी छैन, २१ पुग्नु अगावै कुनै पाप काम गर्नु हुँदैन) भनेपछि रवि बिस्तारै सेलाउन पुग्यो।

आफूमा जागिसकेको पुरुषत्व त्यतिकै मार्नु पर्दा पनि उसको मन प्रफुल्लित भएर आयो। आफ्नी प्रेमिकाको दृढ़ता देखेर खूब रमायो भित्रभित्रै। धेरै इज्ज़त दिन मन लाग्यो, आदर भाव जागेर आयो उसकी प्रेमिकाप्रति। Sorry को शव्दसँगै Flying kiss पायो पल्लो खाटबाट।

तुलना गर्‍यो उसले नयाँ प्रेमिका र नेपालकी प्रेमिका बीच। उता साँझको जुठो भाड़ो गर्न सघाउने बित्तिकै रविना उन्मत्तिदै भन्ने गर्थी, ‘के छ विचार …? अनि त्यसपछि …..अनि त्यसपछि …….।

तर एउटा घटनाले रविले फेरि यता र उताकी प्रेमिकाबीच तुलना गर्न बाध्य भयो। र बुझ्यो वास्तविकता। कस्तो घटना थियो त्यो?

रवि- सानैदेखि चन्चले, चकचके, कतै केही घटनाहरु भए भने पूरापुर चासो राख्थ्यो। विशेषत: फरक फरक प्रकृतिका समाज र समुदायहरुको बारेमा बुझ्नु, चासो लिनु उसको शौख नै थियो। ग्रामीण परिवेशमा हुर्की पढाईको सिलसिलामा शहरतिर लागेको थियो ऊ।

रबिना- लामो केश, ठूलाठूला गाला, गोलो अनुहार, मोटामोटा दाँत, कसिलाकसिला पिँडूला, प्रायगरी आँखामा कालो गाजलले मसिनो रेखा बनाई राख्ने, अनि स्कूल जाँदा लगाउने गरेका हाफ सर्ट र स्कर्ट औधी सुहाउने। साँच्चै भन्नु पर्दा उसको भर्खर वैंशमा प्रवेश गरेको त्यो सुडौल शरीर देखेर अल्लारे केटा मात्र होइनन्, घरजम गरेर बुढ्यौलीमा प्रवेश गरेका अधवैँसेहरु पनि लेघ्रो तानीतानी हेर्ने गर्थे। सामान्य हैसियत भएको परिवारमा दुःख सुखमा बढ्न लागेकी रबिनालाई आफूमा जवानी प्रवेश गर्दैछ भन्ने कुराको आभासैसम्म पनि थिएन। सानैदेखि टिभी. सिरियल औधी मन पराउने रविना र उसको भेट त्यही स्कूल जाने बेलामा हुने गर्थ्यो। छोटो उमेर, अल्लारे केटाकेटी, अपरिपक्व अनि अव्यवहारिक अवस्थामै भगवानले जोडी बनाई दिएका थिए उनीहरुलाई। अनि घरायसी तुनेलो गर्दागर्दै रवि अचानकै हुत्तिन पुगेको थियो अमेरिकातिर।

जमिन भनेको के हो, माटो कहाँ हुन्छ भन्ने थाहा पाउन नसकिने न्युयोर्क शहरभित्रै १२ औं घण्टा काममा जोतिएर रविनाको यादमा हराउँदा हराउँदै पनि रविनाप्रति भरिएको मायाको गाग्रीबाट अचानकै माया चुहिएर एक स्पेनिस केटीलाई भिजाउन पुग्छ।

Johana, भर्खर उमेरले २० पुगेकी, एकदम शान्त र मौन लाग्थ्यो उसलाई। काम सकेर घर फर्कने बेला सँगै रेलमा हुन्थे उनीहरु। बिस्तारै माया बसेको थियो उनीहरुबीच। काम एकै ठाउँमा भए पनि विकएन्डका बिदाका दिनहरुले भर्खर उम्रेको भावनामा पोसिलो मल थपेको थियो। कहिले Central Park , कहिले Brooklyn Bridge , कहिले Battery Park त कहिले Coney Island Beach टहलिन जान्थे उनीहरु। प्रतिफल- उसले रबिनालाई बिस्तारै भुल्दै गयो।

एकदिन Times Square मा रहेको Musuem Of Sex हेरेपछि किन-किन रविलाई Johana सँग छुट्टिन मन लागेन। रात पनि परिसकेको थियो। अनि बहाना बनायो- Podemos quedarnos esta noche al rededor de algon hotel por aca? (के हामी आज यतै कतै होटलमा बस्न सक्छौँ? )

Porque ..? (किन?)

Lo olvide de traer mi llave en lacasa, y no me gusta desperter a mis amigos, porque allos durmiendo. ( मैले घरको चाबी ल्याउन बिर्सेछु, अनि साथीहरु सुतिसके होलान्, म उनीहरुलाई डिस्टर्ब गर्न चाहन्न।)

Esta bien no hay problema. ( हुन्छ, केही आपत्ति छैन)

त्यो रात उनीहरुसँगै भए होटलमा, अनि एकै कोठामा। एकै सोफामा बसेर कुन्नि के च्यानल हेर्दै थिई Johana। रविले मुलायम कपाल खेलाइरहेको थियो, अनि घरीघरी टाउको मुसारिदिँदै थियो। Johana को टाउको बिस्तारै रविको ओठतिर लम्कियो, दुबैका मुख परस्पर जोडिए। क्षण भर मै रवि चरम सीमामा पुगिसकेको थियो सायद Johana पनि …….।

एकाएकै Johana ले रविले कसिसकेको आफ्नो शरीरलाई फुत्काउँदै भनिन्- Otros 2 meses mas (अरु थप दुई महिना)।

रविले केही बल नगरेको होइन, तरै पनि no tengo 21 anos, si tuviera 21 anos no podriamos hacer cosas sin sentido (म अझै २१ पुगेकी छैन, २१ पुग्नु अगावै कुनै पाप काम गर्नु हुँदैन) भनेपछि रवि बिस्तारै सेलाउन पुग्यो।

आफूमा जागिसकेको पुरुषत्व त्यतिकै मार्नु पर्दा पनि उसको मन प्रफुल्लित भएर आयो। आफ्नी प्रेमिकाको दृढ़ता देखेर खूब रमायो भित्रभित्रै। धेरै इज्ज़त दिन मन लाग्यो, आदर भाव जागेर आयो उसकी प्रेमिकाप्रति। Sorry को शव्दसँगै Flying kiss पायो पल्लो खाट बाट।

तुलना गर्‍यो उसले नयाँ प्रेमिका र नेपालकी प्रेमिका बीच। उता साँझको जुठो भाड़ो गर्न सघाउने बित्तिकै रविना उन्मत्तिदै भन्ने गर्थी, ‘के छ विचार …?

अनि त्यसपछि …..अनि त्यसपछि …….।

आफ्नै बाटो कुरी जिन्दगीका कालरात्रि काटिरहेकी रविनाको याद बेला-बेलामा नआउने होइन। तरै पनि उसको वज़न यतातिरै बढ़ी भइसकेको थियो। अनि ध्रुवसत्य हो कि जता वज़न बढ़ी हुन्छ उतै तराजु झुक्ने गर्छ।

*******************

विगत ३ महिनादेखि फरक पाइरहेको थियो रविले Johana को बानीमा। अहिले उनी मौन बस्दिनथी, भेटघाटमा पनि हतारो हुन्थ्यो छुट्टिनको लागि, फ़ोनमा पनि भयभित स्वर हुन्थ्यो। रविको मनमा चिसो नपसेको होइन, तर माया भनेको माया हुन्छ, विश्वास थियो उसलाई आफ्नो मायाको।

धेरै रात भइसकेको थियो चुस्की नलगाएको उसले। हिजो बिहानैदेखि उन्मत्त देखिन्थ्यो ऊ। सायद उसको शरीरमा कुनै उर्जा थपिएको थियो, अनि आफ्नै प्रेमिकाको सम्झनामा डुबिरहेको थियो ऊ। ऊसँग काम सकेर घर फर्कँदा उसकी प्रेमिका ट्रेनमा उसको काँधमा टाउको राखेर भुसुक्क निदाउने गरेका क्षणहरु को याद थियो। अनि सँगै खिचिएका फोटाहरु Laptop को Screen मा सजिएका थिए। उसकी प्रेमिका २१ वर्षमा प्रवेश गरिसकेकी थिई।

हिजो काम गर्ने जाँगर चलिरहेको थिएन। मात्र दिन कटाउने बाटो गरिरहेको थियो र ब्याउने अर्को दिनको पर्खाइमा थियो ऊ। आउने दिनको लागि उसले छुट्टै योजना बनाइराखेको थियो। ऊ Johana सँग भेटेर सँगै बस्ने प्रस्ताव गर्न गइरहेको थियो। त्यसैले पनि होला आजको दिनको पर्खाईमा हिजोदेखि नै उसको मन तुलबुल-तुलबुल थियो।
९० F को मौसमले घर पूरा तातिसकेको थियो। भित्ते घडीले २ बजाइसकेको रहेछ, उसले आँखा खोल्दा। झ्यालबाट देखिएको बाहिरको टन्टलापुर घामसँगै उसले Johana लाई फ़ोन गर्‍यो.. अनि फ़ोन गर्‍यो …अनि फ़ोन गर्‍यो ..।

एक घन्टाको अवधिमा १० औं पटक फ़ोन गर्दा पनि सीधा Voice Mail मा गएपछि र Call Back नआएपछि मन अमिलो भएर आयो। अनि मन भुलाउन कता जाने दोधार मै नजिकैको बजारतिर लम्क्यो ऊ। त्यो बजार उसलाई इन्डियाको सिल्गुड़ी जस्तै लाग्थ्यो, नेपाली र बंगालीहरुको मिश्रण भएको अनि स-साना पसलहरु भएको। भीड़भाड़ मानिसहरुको बीच छिर्दै थियो ऊ, प्रायः ५\५ मिनेटमा उसको माथि भएको रेलको लिकबाट रेल गुडिरहेको आवाज़ले उसका कान सून्य हुन्थे।

एक जना Mexican केटो सुस्तसुस्त Senorita ..senorita भनिरहेको थियो। उसको ध्यान उतैतिर मोडियो। के खोज्छ्स् काना आँखो भने झैँ भयो उसलाई। किनकि स्वभावैले प्रायगरी भिन्नभिन्न समुदाय, रीतिरिवाज़, धर्म संस्कृति, बुझ्न मन पराउने मानिस थियो ऊ, अनि बुझ्न मन लाग्यो आज यो केटोले के भनिरहेको छ भनेर।

सोध्न पुग्यो- de que ablas senor ?(के भनेको साथी ?)
….Senorita …..
donde ….?(कहाँ )
.. en 5 minutos de haca(यहाँबाट ५ मिनट )
….. cuato es ?(कति ?)
….. cuarenta ( चालीस )
…esta bien .(O .K .)..।

केटोको पछि-पछि लाग्यो ऊ। ८/१० पाइलाको फरकमा, ४ बाटो काटेपछि एउटा घरमा पुगेर केटोले ढोकाको घन्टी थिच्यो। अनि आफ्नो नाम अलेक्स भनेपछि भित्रबाट ढोका खोलियो र दुवै जना भित्र छिरे। सानो बैठक कोठा जस्तो अनि राखिएका पुराना सोफाहरुमा अरु ५ जना मेक्सिकन केटाहरु बसेका थिए। साँचो अर्थमा ऊ त्यहाँ केही गर्ने उदेश्यले गएको थिएन। हो, मान्यता राख्थ्यो- SEX IS A FOOD भन्ने कुरामा। तर अभद्र Sex उसलाई मन पर्दैनथ्यो। उसले सोच्न थाल्यो कुनै बहाना, उसलाई भाग्नु थियो त्यहाँबाट।

सिर्फ २ मिनटको लागि ऊ आफ्नो पुरानो अतिततर्फ फर्क्यो, कामको सिलसिलामा आफूले बिताएका सुर्खेतका ३ वर्षहरुको सोचाइमा। अफिसको काम सकिना साथै ऊ आफ्ना साथीहरुसँग बरालिन जान्थ्यो छिन्चुको सानो पुल तरेर। जहाँ एक छुट्टै जातिको बस्ती थियो। उनीहरुको मूल जीवन निर्वाह गर्ने पेशा देहव्यापार र नाचगान। स्थानीय प्रशासनले पनि रोक गरेको थिएन उनीहरुको यो कामलाई। उसका साथीहरु मौका मिल्यो भने यसो कुनै झुप्रोभित्र छिर्न पनि पछि पर्दैनथे। तर ऊ भने त्यही जातिहरुको बीचमा बसी मादल पिट्न थाल्थ्यो।

यत्तिकैमा उसको सोचाइलाई भंग गर्दै उसकै अगाडिबाट कोही Spanish जातकी केटी बैठक कोठा हुँदै भित्र छिरी। झ्वाट्ट साइडबाट हेर्न पुग्यो,

…झस्क्यो….

उही कपाल….

उही स्टाइल…।

शरीर पूरा तातेर आयो उसको। चिर्चिर गरेर चर्क्यो उसको छाला। देख्दै थियो उसले आफ्नै भर्खरै २१ वर्षमा लागेकी प्रेमिका Johana को असली रूप।

Excuse Me भन्दै बाहिरियो ऊ। ढोकामा त्यही केटो थियो, $ २० को नोट हातमा राखिदियो, केटोले Wait Wait भन्दै थियो, वास्ता नै नगरी सरासर आफ्नो बाटो लाग्यो। ग्यारेज़बाट आफ्नो गाड़ी निकाल्यो… सिधै Bear Mountain पुग्यो। अनि तालको छेउमा बसी सोच्न थाल्यो, तुलना गर्न थाल्यो- उसकी भर्खर १६ वर्ष प्रवेश गरेकी उताकी प्रेमिकासँग बुलबुले ताल छेउको चिसो धारामा नुवाई धुवाई गरेका दिनहरु। साँझको बेला रु. १ मा पाउने ४ वटा पानीपुरी किनेर खाऊ भन्दा किन पैसा खर्च गर्ने भनेर च्याँठ्ठिने उताकी प्रेमिका र साँझ नपर्दै आज Tonic Bar जाऊँ भन्ने यताकी प्रेमिकाबीच।

जीवन निर्वाहको लागी ह़र क्षण पसिना बगाउने उताकी अहिले २६ वर्षमा प्रवेश गरेकी उसकी प्रेमिका र कसरी हुन्छ $ कमाउनु पर्छ भनेर लाग्ने यताकी २१ वर्ष टेकेकी प्रेमिका बीच। पैसा चाहिँदैन तपाई भए हुन्छ भन्ने उताकी प्रेमिका र First Money Second Boyfriend भन्ने यताकी प्रेमिकाबीच। बिहान बेलुकीको छाक टार्न देह व्यापारमा लागेका उताको समुदाय र make money भनेर देह व्यापारमा लागेको यताको समुदायबीच। बिदाको दिन आज पल्लो बाटो सफा गर्न जाऊँ भन्ने उताका साथीसँगीहरु र आज off Gathering गरौँ भनी Beer का bottle twist गर्न बानी परेका यताका साथीसंगीहरु बीच। आफ्नो कोठामा मासु पकाएको दिन पल्लो कोठामा बस्नेलाई कचौरीमा लगेर चाख्‍नु है भन्ने उताका भाडामा बस्ने मानिसहरु र आफ्नो लागि खानाको व्यवस्था गरी लुसुक्क आफ्नो कोठामा पसी चुकुल लगाउने यताका एउटै फ्ल्याट शेयर गरेर भाडामा बस्ने मानिसहरुबीच………।

साँझ परिसकेको हुन्छ। रातो लाली देख्छ आकाशमा। अनि शरीर मर्काएर अर्को दिशामा हेर्छ, जहाँ उसकी रविना भर्खर उठेर गाईभैँसीलाई कुडो पानी गरिरहेकी हुन्छे। आज धेरैपछि उसले कल्पनामा रविनालाई देखेको हुन्छ।

-समाप्त-

September 11th, 2010
पुष्पराज गिरी/न्युयोर्क

(स्रोत : Mysansar.com)