~पुष्कर लोहनी~
१.
भएको भए
मस्तसँग पिउथेँ
आँखा चिम्लिँदै ।
२.
चट्याङ खस्यो
चिरेर दुइ कापा
थेग्रिँदा रातो ।
३.
गहिरिएछ
मस्किएछ हल्लिँदा
खोबल्टे आँखा ।
४.
खोजेको थिएँ
खन्याउने विचार
रक्सी साटेर ।
५.
ढलेको ढल्यै
सम्झँना बाँधिएछ
रक्सी पोखिँदा ।
६.
सेतो पछ्यौरा
रक्सीको दाग पर्दा
पहेंलो धर्सा ।
७.
आकास खोज्दा
लठ्ठिएको आवाज
जमेको धूलो ।
८.
हात घुसार्दा
आँत्तिएको पाइला
चिसो बगैंचा ।
९.
कालो कमिला
खोतल्दै भित्र छिर्दा
भित्तै हल्लनु ।
१०.
कुना पसेको
पिउनुसम्म पिएँ
पोखिएँ पनि ।
११.
घुमेको देखें
समाउन सकिन
दौडेको छायाँ ।
१२.
छुट्टिदाँ रोएँ
सँगै पिएको रक्सी
गिलाँस खस्दा ।
१३.
लाम्चो गिलाँस
मात्तिएर फुर्केकी
रक्सी रित्तिँदा ।
१४.
कोल्टे फर्किँदा
चिसो छोक्रा छिरेछ
मेघ गजिदैँ ।
१५.
सराप्दै रोएँ
भाँच्चिएको भरेङ
तातो खरानी ।
१६.
तुसारो खस्छ
लोभलाग्दो गुलाफ
लङ्कडो खुट्टा ।
१७.
मह निकाल्दा
घोचेको अन्धकार
हल्लेको डोरी ।
१८.
आँखा कोपर्दा
खोतलेको मसान
सर्प बाहिरै ।
१९.
पल्केको बाटो
फुत्केछ आफैँबाट
सर्प छिरेछ ।
२०.
जङ्कली भेंडा
खोरभित्र लडेछ
झुण्डिँदा मस्त ।
२१.
आँखा चुहियो
कुल्चिँदा छापै छाप
तिमीले टेक्दा ।
२२.
खुकुलो आँखा
निहुरिँदा भत्केछ
दरिलो झोक्का ।
२३.
फोका उठेछ
उम्लेको चिसो पानी
तातो फलाम ।
२४.
खोजेको खोज्यै
नाप्न खोज्छु भत्किन्छ
उम्रेको झार ।
२५.
रित्तो गिलास
सपना आफैँ खस्छ
पोखिन्छ आफै ।
२६.
वैंश खोजेकी
अल्झिएर पातमा
थारो कल्चौंडो ।
२७.
कालो लेसिलो
समाउन सिपालु
जालो पुरिँदा ।
२८.
चटकी औँला
लघार्दै दौडिएको
खुला टोकरी ।
२९.
साँटु भनेको
लोभ्याउँदै भागेकी
सन्केको आँखा ।
३०.
टल्केको टाँक
कस्सिँदा थिचिएछ
चिन्नै सकिन ।
३१.
सुम्पिन खोज्छु
थुप्रिएको पहाड
बगेको नदी ।
३२.
बिर्सेको रात
चिप्लिएको आवाज
घोडाको टाप ।
३३.
ढुङ्का खसाल्दा
बिथलिएको निन्द्रा
छायाँको थोपा ।
३४.
छरेको थिएँ
मलिलो पार्दै माटो
खसेको रात ।
३५.
टाउको फुट्यो
तारो हान्न पल्किँदा
घिसार्दै फाल्दा ।
३६.
चिसो विश्वास
तताउन नखोज्ने
हात समात्दै ।
३७.
ठुङ्न जानेकी
पोखाउन पल्केकी
अँगेनो छोप्दै ।
३८.
कठोर मन
खिया लागेको आँखा
जिउ सुन्निंदा ।
