~पुन्टु पण्डित~
स्वतन्त्रता यहाँ मनमोजी भो
नकचरोको भरिभराउ गोजी भो
नेताको चालढाल पनि पोजी भो ।
जेसुझ जसको समझमा आउँछ
उसले त्यही नै गर्ने भयो
हिंसा, हत्या, लुटपाटले
उपद्रव गर्नेलाई तुर्ने भयो ।
व्यर्थैमा शान्तिको खोजी भो
स्वतन्त्रता यहाँ मनमोजी भो ।
कति दिक्क हुने यस्तो देख्दा ?
दंग परी बरु हाँस्नै जाती
नंगा नाचमा रमाउँदै
जानै उचित हो कि त बराँती
गडबड नै रोटी रोजी भो
स्वतन्त्रता यहाँ मनमोजी भो ।
निर्धा, निमुखा जहिले पनि
थिचिएकै मिचिएकै देखिन्छ
न्याय यही नै हो कि भनी बरु
चित्त बुझाइ बसे के हुन्छ ?
उद्धारकको उपाय पनि झोजी भो
स्वतन्त्रता यहाँ मनमोजी हो ।
नांगिनेले नांगिन पाएकै छन्
बांगिनेले बांगिएर कमाएकै छन्
इज्जत हुर्मत भोजी भो ।
स्वतन्त्रता यहाँ मनमोजी भो ।
(स्रोत : श्री रुपरेखा)
