~ईश्वर थोकर~
१. आमा ए सुर्ता आताउ ङा योनान साल्सि खाला
सेमदा कोङना लाउ ङा योनान साल्सि खाला
प्रुलुलु मिख्लि आपुइना सुर्ता गेक्खे आथान्ना
यो ङ्यासेला चाबा चाउ ङा योनान साल्सि खाला ।
२. आखाम्बा थेःसि एसे बिजिम ङादा योना साल्गाइ
क्याबोइ पेःसि एसे बिजिम ङादा योना साल्गाइ
खाइमाहेन्दे मार फ्रोल ताइबार छेःबा एला
थे मिख्लि तेःसि एसे बिजिम ङादा योना साल्गाइ ।
३. दाःङसि–दाःङसि बोर्जि ङाला म्हाङकादे साङगुलसे
आङसि–आङसि बोर्जि ङाला म्हाङकादे साङगुलसे
ङादा याकार तानालासि क्रानालासि ङालान ओन्छाङ
ताङसि–ताङसि बोर्जि ङाला म्हाङकादे साङगुलसे ।
४. एसे लासि ङाला मिख्लि स्हाम्बा आरे साङगुल
स्हेर छासि ङाला मिख्लि स्हाम्बा आरे साङगुल
खाइमा–खाइमाहेन्दे एसे पिन्बा स्हेरकादे
मुरि जासि ङाला मिख्लि स्हाम्बा आरे साङगुल ।
५. ङा ङालान ग्यामरि ब्राला खालाइसे ङादा आकागो
फुर ताङसि मुरि जाला खालाइसे ङादा आकागो
खालाइदा आतोइना–आठेल्ना ङाइ ङालान सारि
डम्फु–टुङना ह्राप्सि स्याला खालाइसे ङादा आकागो ।
(तामाङ डाजाङ साहित्यिक मासिकमा प्रकाशित ।)
(स्रोत : रचनाकार स्वयंले ‘Kritisangraha@gmail.com‘ मा पठाईएको । )
