~योगेन्द्र राज शर्मा ‘प्रकार अन्तर’~
विसंगत सपनाहरुको संभोग
म के संगत !
बोझिल पहाडको छाती
चरक्क चिरेर
निस्कन्छन् खोलाहरु
खोलाहरु सँगै
केही पिसाचहरु
केही रहस्यहरु
चुपचाप !
चुपचाप !!
केही खुँखार मसानहरु
नारायणहिटी/हनुमान ढोका
हनुमान ढोका/नारायणहिटी
ओहोरदोहोर गर्छन्
अनि केही कुण्ठाहरुको बहस
माइक्रोबस भित्र
उसै तातिरहेको हावा ।
रिंगटा-बान्ता
बान्ता-रिंगटा
गजधम्म यौटा पत्थर !
खोलाको माझमा
म के स्वतन्त्रता !
तर एक साधन अवश्य
यौटा प्वालमा पसेर
फनक्क घुम्छ पानी
कहिलेकाहीं चिमोट्छ पानीले
फिंज काढेर हाँस्छन् फोकाहरु
हाहाहा……..हाहाहा……….
म सुन्छु संगीत
मेरो छातीबाट
फुत्त हाम फालेर
भर्खरै यौटा खोलाले
कत्रो हुँकार गर्यो !
म पनि हाँसिदिएँ
जानि-नजानी
एकबारको जूनी
बनूँ कति अन्तर्मूखी ?
बिसंगत सपनाहरुको संभोग
म के संगत !!!!!
(स्रोत : Inepal.Org)
