गजल : अटल हुन्छ हुन्न

~विजय योजीत~

भनेकै हुँ माया अटल हुन्छ हुन्न
रसाएर आँखा तरल हुन्छ हुन्न !

नकारेर झुप्रो गयौ आज छोडी
छ यो हेर्नु भोली महल हुन्छ हुन्न !

चलाएर ढुंगा तिमी मात्र दुख्यौ
अझै हेर्न खोज्छौ दखल हुन्छ हुन्न !

यहाँ सम्म मैले सपार्दैछु नाता
तिमीमै छ बाधा सफल हुन्छ हुन्न !

गयो पाठशाला संधैको छ चर्चा
बहरमा नलेखे गजल हुन्छ हुन्न ?

बहर : मुतकारिब
रुक्न : फऊलुन् × चार

(स्रोत : पल्लव साहित्य प्रतिष्ठान)