~विजय महर्जन ‘श्रीजय’~
समय सधैं एउटै हुन्न रे
कहिले घाम त कहिले छाया हुन्छ रे
कहिले रित्तो त कहिले भरीभराउ हुन्छ रे
तर साथी मेरो समय सधैं रित्तो र छाया मात्र किन?
समय भाग्यको खेल हो रे
कहिले पापी त कहिले साधु बन्नुपर्छ रे
कहिले झुटो त कहिले साचो बन्नुपर्छ रे
तर साथी म सधै पापी र झुटो बन्नु किन?
समय बलवान हुन्छ रे
कहिले खुकुरी त कहिले मसिले जित्छ रे
कहिले अहंकार त कहिले स्वाभिमानले जित्छ रे
तर साथी म मात्र तरवार र अहंकारको साथमा किन?
शायद मैले शिव बनी बिष पिउनु छ होला ।
अनी छाया बनी सबैलाई सितलता दिनु छ होला ।
शायद अझै झुटो बोलेर राजनीतिज्ञ बन्नु छ होला ।
अनी पापी बनेर दुश्मनको पराकास्ठालाई डग्मगाउनु छ होला ।
शायद नेपाल आमाको छोरा भएकोमा ममा अहंकार छ होला ।
अनी वीर गोर्खालिको भाषा मात्र खुकुरिले जित्छ होला ।
अप्रील 4, 2008
(Source : INLS – australia)
