~नव बिहानी~
ए हो त
पहाडले जहिल्यै
तराईमाथि शासन गरेकै त हो
मध्यछाती चिरेर महेन्द्रले
वारपार राजमार्ग बनाउँदा
कत्ति दुःखेछ तराईको चित्त
त्यतिका धेरै उद्योगहरुले
दरफर्याउँदा तराईको छाती; उफ् मुटु मधेशबाट
भक्कानिएर त्यसै त्यसै
सामन्ती राजा मूर्दावाद
चुहिएको हुनुपर्छ
हो त
पञ्चायत पक्षपाती भएकै हो
राजाले विभेद गरेकै हुन्
नभए तराई उफ् मुटु मधेश !
आज दिनदिनै गणतन्त्रको शिकार
हुनुपर्ने थिएन कि !
हाय !
कस्तो अन्याय ! कस्तो विभेद !
धन्न ल्याइदिए छिमेकीले
गणतन्त्र ; मान्छे मार्ने साँचो
धर्मनिरपेक्षता ; मान्छे मार्ने हतियार
संघीयता ; विभेदको श्रीगणेश
बिचरा लाटा हिमाल र पहाडहरुलाई
पञ्चायतले कमसेकम
जोगाएकै हो
खनिदिएको भए तराईजसरी वारका पार
सायद,
मनमोहक गुफाहरुभित्र
हुइँकिरहेका हुनेथिए कि रेलगाडीहरु !
धन्न सकुशल छन्
नभए त
यिनीहरुले पनि आन्दोलन गर्नुपर्थ्यो
तराईले झैं –
आन्दोलनमा मर ५० लाख दिन्छु भनेर
मलाई त आजकल त्यस्तै लाग्छ –
छुच्चा सामन्ती पृथ्वीनारायणलाई
किन नेपाल बनाउनुपरेको ?
पहिल्यै लिम्बूवान छोडिदिएको भए,
पहिल्यै नेवा भन्दिएको भए
के जान्थ्यो !
आज कोतपर्वको ईतिहास पढ्नुपर्ने थिएन
पञ्चायत सहनुपर्ने थिएन
१० वर्ष लगाएर १८ हजार जनता मार्नुपर्ने थिएन
उहिल्यै आएको हुने थियो गणतन्त्र, संघीयता
र उहिल्यै
मुख्यमन्त्री भइसकेका हुने थिए बीपी, पुष्पलाल र गणेशमानहरु
पालैपालो सूर्यबहादुर, गिरिजा, प्रचण्ड, बाबुराम, नेपाल र ओलीहरु
बित्थामा नेपाल बनाएर
सामन्ती राजतन्त्रले २३९ वर्षसम्म निरन्तर
नेपाली बनाइराख्यो अफसोच !
सबै सामन्ती अवशेष चिर्दै
दिल्लीमा खाइएको शपथग्रहण
यही आउँदो ३ गते नयाँबानेश्वरबाट
सिंहदरबार हुँदै देशैभर लागू हुनेछ…
हामी सामन्ती सत्ताबाट मुक्त हुनेछौँ
हामी स्वायत्त हुनेछौँ
तर थाहा छैन
मेरो देशको नाम के हुनेछ ?
(स्रोत : Hulaki)
