~चन्द्र गुरुङ~
१
बन्द गर–
नून,
तेल
र, ग्याँस ।
युगौँदेखि
यी थोक खाएर बाँचिरहेको होईन
मेरो स्वाभिमान ।
२
नाकाबन्दी गर
अन्धकारमय बनाऊ हाम्रा दिनहरू
फैलाऊ अशान्ति
लात्ती हान हाम्रा पेटहरूमा
तर
दुख्ने छैन मेरो देश ।
यो देश पेटमा होइन
छातिमुनि
सुरक्षित छ असंख्य मुटुहरूमा ।
३
नाकाबन्दीमा
ग्याँस नभरिएला खाली सिलिन्डरहरूमा
तेल नभरिएला मोटरगाडीहरूमा
र, नभरिएला भोका पेटहरू ।
तर
असंख्य मनहरू मस्त भरिएकाछन्
सुनौलो देशप्रेमले ।
४
नाकाबन्दीले
झुक्ने होइन हिमालको अग्लो शिर
सुक्ने होइन पहाडको रंग
साँघुरिने होइन विशाल तराई ।
झन् झन्
फुल्ने छ देशप्रेमको सुन्दर फूल
हाम्रा मुटुमाझ ।
५
यस नाकाबन्दीको बेला
नबल्ला दियो
नबल्ला चूलो
नबल्ला घरआँगनमा उज्यालो ।
तर पक्कै तिमीप्रति
बल्ने छ असंख्य असंख्य मनमुटुमा
आक्रोशको आगो ।
(स्रोत : रचनाकारको फेसबुकबाट सभार )
