गजल : एउटा अँध्यारो पाटोको पनि

~मन क्षेत्री~

एउटा अँध्यारो पाटोको पनि
जुलुस निस्किँदै छ माटोको पनि

हाम्रा पैतालाहरुमा ठेला उठिसकेका छन्
सायद उठ्नेछन् अब बाटोको पनि

आखिर आउने भनेको त्यही याद न रहेछ
मिलनको पनि फाटोको पनि

नभनूँ भनेर पो नभनेको हुँ त
हजार कारण छन् आँसुको टाटोको पनि

बैंसमा पिरती कसको पो हुन्न र
थियो मजस्तो लाटोको पनि ।

नि.अध्यक्ष, गजल सन्ध्या, पोखरा

(स्रोत : सम्मोहन साहित्यिक पत्रिका)