~जीवन ‘सागर’ भण्डारी~
आज फेरि मनभरि नानाथरि कुरा चल्यो
कुनै कुरा आधा चल्यो कुनै कुरा पूरा चल्यो
वेदनाको कालो बादल किन छायो कुन्नि ?
हाँसो कता हराएछ कसले पायो कुन्नि ?
रातदिन आँखाबाट आँसु झरेपछि
मीठै लाग्दो रै’छ त्यही बानी परेपछि
मनभित्र आँधी हुरी किन चल्यो होला ?
नियतिले यति धेरै किन छल्यो होला ?
रेटेपछि सारङ्गीलाई पर्छ जसै रून
त्यही रूँदा दुनियालाई बन्छ मीठो धुन
-कास्की
(स्रोत : सम्मोहन साहित्यिक पत्रिका)
