तामाङ भाषी कविता : मुक्लान्नरी निबा ए कोला

~भिम दोंग तामाङ~

आमा : फ्याङ्सी खबा चारी एसे
ङाला कोल्ला खबर तिलाई आबमु
ङ्हिदिङ सोम्दिङ तासिजिन्जी
ए कोला मुग्लान वङ्निब
फ्लिक्दोसी खाइमाइ आखमु

आमा : ए कोल्ला सेम कदे कोङ्बा
चु आमादा डन्सि आखब
एला आमा प्राङ्बो दु:खिता
दुहर साहु खादासी
छे मुबा टँङ्गा बाउ बिजी
मुग्लान्ला ए कोल्ला आश लासी
दुहर साहुता ह्या बिजी

आमा : बोगाल सोम्ला एला आमा
ए कोल्ला कदे ग्याम च्याजी
दिन मुन कदे ङा क्राजी
चु उमेर ङला तसी जिन्जी
साहारा पिन्बा म्ही आरे
ह्युल्सा नम्सा धिम डान्सी
दोसी खाउ दारेम ए कोला

छोरा : ङा कोला मुग्लान वङ्निबा
ङ्ही दिङ सोम दिङ तसिजिन्जी
दिन मुन साहुला गेलसी
ल निबा दिन निबा थाअरे
साहुला गे लापा दुइरिमी
ङाला आमा थुम थुम दान्ममी
ङा कोला मुग्लानरी कदे क्राजी

छोरा : एला कोला जिसी अक्राको आमा
दु: खारी तसै सेम नागो
ङा खाला योनान ह्युल्सारी आमा
एला मिला मिख्ली फ्यापरी

भिम दोंग तामांग
(पिन्थिल)

(स्रोत : Tamanghyulsala)