मैथिली गजल : कुच्चा छै

~धिरेन्द्र प्रेमर्षि~

शासनके लोडहीतर लोक बनल कुच्चा छै
लोडहपर हाथ जकर अगबे सब लुच्चा छै

कहने छल जत्ते छै खधिया हम पाटि देब
वैषम्यक ठाढ मुदा पर्वत समुच्चा छै

वर्षा छै, कोशी आ बागमतीक बात छोडू
बमबम करैत अखन छोटको टुकुच्चा छै

दू मूहा गनगोआरि रूप छै देखौआटा
पाएत तँ छोडत नइ, गहुमन ई सुच्चा छै

झाँपितोपि रखने अछि अपन कुकुरदँत्ताके
रहब नइ भ्रममे जे लोक ई दँतुच्चा छै

(स्रोत : Onlinesahitya )