~गोविन्द गिरी प्रेरणा~
हेपाहाको धर्म हेप्नु हो
हेपाहाको कर्म हेप्नु हो
हेपाहाहरु हेप्नुलाई नै मोक्ष ठान्दछन्
मोक्ष मान्दछन् ।
हेपिनेहरुले
हेपिनुलाई कर्म नमानेपछि
हेपिनेहरुले
हेपिनुलाई धर्म नमानेपछि
हेपिनेहरुले
हेपिनुलाई मोक्ष नमानेपछि
हेपाहालाई औडाहा हुन्छ
तथानाम वोल्न थाल्छन्
तथानाम वोलेरै हेप्न खोज्छन्
धम्की दिन्छन्
तर्साउन खोज्छन्
जसरी पनि हेपेरै छाड्ने
मनसुवा राख्छन्
हेपाहाहरु आखिर हेपाहानै त हुन्
हेप्नै खोज्छन् ।
हेपिनेहरुको आत्मवल
सगरमाथा भएर चुलिएपछि
हेपिनेहरुको आत्म विश्वासले
उँचाईं लिएपछि
हेपिनेहरुको स्वाभिमानले
उडान र अडान लिएपछि
हेपाहाहरुको क्यै क्यै लाग्दैन
तिनका डर धाकको क्यै लाग्दैन
लछारपाटो क्यै लाग्दैन तिनको ।
हेपाहाहरुको युग गइसक्यो
हेपाहाहरुको दिन गैसक्यो
स्वाभिमानको अभेद्य चट्टानलाई
हेपाहाहरुले भेदन गर्न सक्तैनन्
आत्म विश्वासको पहाडलाई
हेपाहाहरुले डग्मगाउन सक्तैनन् ।
हेपिनेहरु खुट्टा नकमाउ
आफ्नो घर झगडामा
छिमेकीलाई नमिसाउ
मेरो घरभित्रको मामलालाई
आफ्नो नवनाउ
यो दुनियाँमा कतै सत्यको मूल्य छ भने
हेपाहाहरुलाई त्यसैले
भष्मिभूत वनाउनेछ
त्यही सत्यले नँग्याउनेछ हेपाहालाई
दुनियाँमा हेपाहाहाहरु
टिक्ने छैनन्
स्वाभिमानको रापमा ।
२२ सेप्टेम्वर २०१५
मनासस, भर्जिनिया ।
(स्रोत : रचनाकारको युट्युबबाट सभार )
