~श्यामल~
तातो हावाको झोक्काले
फर्फराउँछ
पराजित मुलुकको झन्डा जस्तो
दशनीको लेहंगा ।
धेरै चोट सहिसक्यो
धेरै रगत बगाइसक्यो
धेरै बलात्कार खपिसक्यो
जमिनदारको बाँझो खेतमा
धेरै कुलो लगाइसक्यो
घामपानीको मारले
जति मधुरो देखिए पनि
अझै रङ्गीन छ
हजारौं फूल फुल्ने उद्यान जस्तो
दशनीको लेहंगा ।
दाउरा लिन गएको
जंगलबाट फर्केन
कसैलाई थाहा छ कि
कहाँ फर्फराइरहेछ बुट्टेदार
दशनीको लेहंगा ।
४ मे, २००२
हाल : नेपालगन्ज
(स्रोत : वेदना साहित्यिक त्रैमासिक, पूर्णाङ्क ६५, वर्ष २९, अंक १, असार २०५९ )
