~डा सुरेश ज्योतिपुञ्ज~
हुन नहुने हुन खोजेँ , आज मलाई माफ गर।
तिमीलाई छुन खोजेँ , आज मलाई माफ गर।
सुनाउँदा कथा आफ्नै, बिर्सिएछु तिम्रो कथा,
बैगुनी भै गुन खोजेँ , आज मलाई माफ गर।
न त खस्यो मेरो आसुँ,न त मुस्कु’राउनै सके,
सङ्गै हास्न रुन खोजेँ ,आज मलाई माफ गर।
बालुवाको राशी देखेँ , केलाएर हेरेँ कति ,
हिरामै लौ सुन खोजेँ,आज मलाई माफ गर।
भेट्ने हो कि आँफैलाई,तिमीलाई खोजेपछी,
किन खोजेँ कुन खोजेँ ,आज मलाई माफ गर।
धेरैचाहि एक्लै लेखे, कमै लेखे मिली सङ्गै,
गजलमै धुन खोजेँ ,आज मलाई माफ गर।
नगिचैको तिर्थ हेला,ज्योतिपुञ्ज लाटो हजुर ,
तलाउमा जुन खोजेँ ,आज मलाई माफ गर।
हुन नहुने हुन खोजेँ , आज मलाई माफ गर।
तिमीलाई छुन खोजेँ , आज मलाई माफ गर।
सुरेश ज्योतिपुञ्ज
नुवाकोट, नेपाल
हाल,
जिपमेर मेडिकल कलेज
पन्डिचेरि,भारत
2010-05-08
(स्रोत : नेपाली गजल गुगल ग्रुप )
