कविता : भुइँचालो : कविको आँखामा

~नाकिमा~

भुइँचालो आयो
र पैसा गन्दागन्दै
पाँचौं तलाबाट हाम्फाल्यो ठेकेदार

भुइँचालो आयो
र बीचैमा मन्त्र छाडेर
चौरतिर दौडिए पण्डित बाजे

भुइँचालो आयो
र शपथ लिँदालिँदै भाग्नु भो
नयाँ मन्त्रीज्यू

भुइँचालो आयो
र घुस लिँदालिँदै कुदे
कर्मचारी

भुइँचालो आयो
र चोर्दाचोर्दै
एक्कासि साधु बन्यो चोर

भुइँचालो आयो
र आँगनमा नाङ्गै निस्किए नवदम्पती

भुइँचालो आयो
र दुनियाँको मनमा ढ्याङ्ग्रो ठटाएर गयो

भुइँचालो आयो
र सबैको सातो उडाएर गयो

मुत्युबोध गराउनलाई आइरहोस्
भुइँचालो
जीवनबोध गराउनलाई आइरहोस्
भुइँचालो ।

(स्रोत : Esamata)