~जयदेश श्रेष्ठ~
पशुपतिनाथको दर्शन पछि गेटमै साथी भेट भयो । ओ हो के छ है, तिम्रो हाल खबर ?( बुद्धिप्रसादले ढाप मार्दै साध्यो नरम प्रसादलाई) के हुनु म त आजित भए । खै स्थानीय चुनाव पनि कहिले हुने हो ? किन चाहियो चुनाव सुनाब बुद्धि प्रसाद रंन्कियो । काम गर्न सार्है गा–हो भयो । घरमा बसे पनि सुख छैन । अफिसमा पनि सुख छैन । हैन त्यस्तो के परयो तिमीलाई, हामी दुवैको काम एउटै हो । (अचम्म मान्दै बुद्धि प्रसादले सोध्यो ) घरमा बस्दा नि, ए सचिव मेरो फलानो सिफारिस लिनु छ, आज अलि चाँडो आउनु भनेर सबैले मोबाईलबाट थर्काउँछ । अफिस गयो सबैतिर फोहरै, फोहर हुन्छ । सफा गर, खाने पानी सफा भएन गा.बि.स.मा पनि यस्तो पानी राख्ने हो ? भनेर कराउन्छन् सबै । बजेट छैन आफ्नै पैसाले मिनिरल वाटर किनेर राख्नु पर्छ । घरमा श्रीमती छोरा छोरी खर्च बर्च पुगेन भनेर हैरान गर्छ । के गर्ने …म त मरु कि बाँचु भएको छ । त्यसैले जे पर्छ पर्छ भनेर दुई, चार दिन दुल्न निस्केको पशुपतिनाथको दर्शन गरेर फर्केको तिमीसँग भेट भयो । मैले आफ्नो मिल्ने साथी भएर तिमीलाई यो कुरा भनेको के गर्ने ? (रुन्चे स्वरमा नरम प्रसाद बोल्यो ) अब तिमी कहाँ जान्छौ त …… । खै कता कता ……..लौ मसँग हिड दुई दिन । आज शनिवार घरमा नै जाउँ भनी घर लिएर गयो नरम प्रसादलाई ।
पेप्सीकोलाको फाँटमा कम्पाउण्ड घेरेको घर गेटमा “ सचिव, बुद्धि प्रसाद नेपाल निवास ”( तीन छक प–यो नरम प्रसाद ) भित्र जान लाग्दा जर्मनी सेफर कुकुरले भुक्यो । नरम प्रसाद डर मान्दै अघि बढयो । भित्र दुलही झै सिगारिएर बसेकी महिलालाई … हेर मेरो मिल्ने साथी मैले सरुवा मिलाएको भनेको उसैसँग हो । उसको ठाउँमा म र मेरो ठाउँमा ऊ गएको हाम्रो काम एउटै हो । पशुपति दर्शन गर्न आएको रहेछ । गेटमै भेट भयो, मैले जब्बरजस्ती पाहुना मान्न ल्याएको, ल राम्रो बन्दोबस्त गर्नु । हवस् भनी बुद्धि प्रसादको श्रीमती भित्र लागि । शनिवारको दिन मिठो परीकार खानदानी सत्कारका साथ बडो आनन्दले आजको दिन बित्यो । एउटै पोष्ट साथीको प्रगति र आफ्नो दुर्गतीले राम्रो ओछयान भएर पनि रातभर निद्रा लागेन नरम प्रसादलाई ।
आईतवार साथीलाई आफ्नो कार्यालय लिएर हिडयो । दुवै मोटरसाईकलमा गफ गर्दै । बुद्धि प्रसाद बोल्यो चुनाब भयो भने बर्वाद हुन्छ हाम्रो पावर सबै चट्ट । सभासदहरूले पांच करोड माग गरेर सबै खर्च उनीहरूले नै गर्ने हो भने,हाम्रो काम के ? चुनाब किन गर्नू प–यो । उनीहरूले नै चलाए भै हाल्यो, उनीहरूकै भयो देश । आक्रोश पोख्यो । देशको नाली बेली सुनायो बाटो भरी । गा.बि.स. कार्यालय पनि आई पुग्यो । नरम प्रसादलाई सचेत गरायो । तिमी चुप लागेर हेरी बस्नु, कुनै कुरा नबोल्नु, आफ्नो काम कुरा केही नखोल्नु बुझ्यौ । नरम प्रसादले टाउको हल्लायो ।
गा.बि.स. कार्यालयमा हाकिमलाई पर्खे झै लाम लगाएर पर्खिबसेको छ । काम परेकाहरू, नमस्कार फर्काउन्दै माथि चढयो । अफिस कोठामा पुगेर सहायक अस्थायी दरबन्दी स्थानीय केटाले सबै काम ठिक पारेको रहेछ । आजको काम के छ ? केटाले बोली बिस्तार लगायो, पहिलो काम पांच दलको मिटिङ्ग छ । खुला दिशा मुक्त क्षेत्र घोषना गर्ने बारे । अरु कामहरू सबै मैले मिलाइसकेको छु । सही गरे पुग्छ हजुर । ल हुन्छ भनेर यता उता घुम्दा घुम्दै मिटिङ्गको समय भयो । भित्र पसेर सुरु गर्दा ११ बजे सुरु गरेको मिटिङ्ग २ बजेतिर सकियो । मिटिङ्ग सकेर कान्तिपुर, गोखापत्र, साप्ताहिक र स्थानीय पत्रिकाहरू सबै केलाएर हेर्दा ३ बज्यो । खाजा साजा खाँदा ४ बज्यो । बल्ल कामतिर चासो देखायो । फाईलहरू यसो हे–यो । कहाँ कुन बिग्रेको छ । नपुग के छ, फोटो नटाँसेको, नागरिकता फोटो कपि नभएको सबै पाखा लगायो । कुनै पनि सही गर्ने छाँट देखाएन । ५ बजेपछि होइन सबै मैले नै हेर्नु पर्ने निबेदन त्यति पनि लिलाएर ल्याउन्दैनन् । मैले के मात्र गर्ने ? मेरो आज पाहुना आएको छ । बिचरासँग बोल्न समेत फुर्सद भएन । ल भोलि गरौला भनी जान खोजे । होइन सर आज जसरी भए नि गरी दिनु होला । नमस्कारको ओईरो लाग्यो । हैन अफिस समय सकियो, हैन हामीलाई सधै यही गा.बि.स.मै बास बस्नु पर्ने भयो बा…. । पाहुना आउदा समेत फुर्सद भएन । वहाँलाई खानपिन समेत गर्न भ्याएको छैन । हैन सचिवज्यू केही दुख गरी दिनु परयो । हजुरको पाहुना हाम्रो पनि त पाहुना हुन नि त हामी हेर बिचार गरौला । हजुरले यति काम सकिदिनु होला ( दुख मनाउ गरे जनताहरूले ) । खै जनताको काम हो । अफिस समय सकेर पनि दुख गर्नू परयो ल है बिचार गर्नू (सहायकलाई इसारा ग–यो) ।
खल्तीबाट एक टुक्रा सुपारी निकालेर मुखमा राख्दै बोल्यो के गर्ने नखाईकन त काम नै गर्न सकिन्दैन बानी परयो । अँध्यारो कुनामा बसेर दनादन सही गर्न थाल्यो । हरेक फाईलमा पाँच पाँच सयका एक एक वटा नोट । काम सकेर हतार हतार साथीलाई लिएर हिडयो मोटरसाईकलमा । के गर्ने साथी सोझो औलाले ध्यु आउँदैन, डरायो भने थर्कायो । बुद्धि पु–याएर बुद्धि प्रसाद भएको छु म । साथीलाई रत्नपार्क पु–यायो । छुट्टीने बेलामा ल साथी आजको कमाई साथीलाई पनि नछुट्टयाउ पाँच पाँच सयका ६ वटा नोट खुसुक्क हातमा थम्याँयो । साथी मोटरसाईकल चढेर हुईकियो । नरम प्रसाद हातको पैसा हेरेर टोलाएर बस्यो ।
August 22, 2014
(स्रोत : Sahityasansar.com )
