~सरुभक्त~
उभिण्डो टोपी लाएर
निर्वस्त्र शान्ति
रेसकोर्टका घोडाहरुझैं दगुरे
खोई, क्रयाक्पट् वुद्धहरु कता लागे ?
गडम्यानहरु
सैतानहरुका वस्तीमा छन्
हिजो हामीले प्रेमदिवस मनायौं आज
घृणादिवस मनाउँदैछौं
‘गोली ठोक्नु पर्छ त्यस्तो कविलाई !’
युगकविको युगीन वाणी हो
चरमराएका मानवविकास परिसूचकांकमा
खोई कविता कहाँ छ ?
कम्प्युटर भिजनसिन्डोम ः हामी अनलाइन
पूजामा ब्यस्त छौं
यतिखेर तुरुप हराएका जुवाडेहरु
बिरामीहरुको मौन जुलुशमा सामेल छन्
शरणार्थी देश कहाँ छ ? हृदयमा कि भूमिमा ?
आह ! शान्ति क्षेत्र नेपालमा जहिलेपनि
शान्तिवार्ताको हल्ला छ
अन्तहीन यक्षप्रश्न ः केराउवारीका सामुहिक वलात्कारहरु
हेर ! हेर ! इतिहासका झ्याक्रे अधिनायकवादीहरु
बहुरुपी नाच नाच्दैछन्
हामी कहाँ छौं ? भग्नावशेषहरुको भग्नावशेषहरुमा छौं
यसर्थ जिन्दगीका खरखडाइहरु
ग्वेवेलियन शैलीमा वेपत्ता छन्
आउ, आत्माहरुको क्लोनिङ गरौं !
कारण उता डोलीमरिछ यता हामी
स्वस्थानी व्रतकथा सुन्दैछौं
धडपकड जारी छ
धरपकड जारी छ …
अझैपनि टेरेन्टुलाहरु काशीवास गएका छैनन्
पशुवधशाला त्यहाँ छ, मानववधशाला सर्वत्र छ
आह ! यहाँ कोही गड्यौला खेती गर्दैछन्
कोही शहीद खेती गर्दैछन्
एत्तेरिलै ! गरीवीमापन गर्ने हो ? शमृद्धि मापन गरे हुन्न ?
‘आयो गोर्खाली !’ आजभोलि इतरयुद्धमोर्चाहरुमा
सर्वत्र चौकिदारीका माग वढेका छन्
ए, रुखचढ्ने गँगटाहरु !
हाम्रा देशवासीहरु के गर्दैछन्
गाँजा नभित्र्याएर ?
(स्रोत : साहित्य संग्रहालय )
