~निलन कुमार थेच्वमि~
लुमुसे च्वंक त्वयाःच्वंगु
निभाःया जःयातः पनां
चकंगु सर्गतय् ब्वयाःच्वंगु
सुपायँ दथुइ वइतः खना ।।
सचिका तयाः सपथुनाः तः थें
गनः गनं छेँनय् चम्पकु स्वाँ छुनाःतःथें
वइगु छेँनय् स्वाँया आकृति खनेदु ।
अजुचायाः छकः क्वथिक स्वया
गन गन, वइगु छेँनय्…
न्हूँ समाजं क्वंगु लँपुइ…
ल्यासेपहः क्यनाः लंजुवा जुजुं
न्यासिवयाः च्वंम्ह मय्जु थें
सपः फ्यनाः सँ यातायाता खाय्का
न्यासिचाचां जि पाखे
जिगु न्ह्योने वयाःच्वंगु थें नं च्वं ….
जि अजुचाया वइतः स्वया…..
वं न जित हे स्वयाःच्वंगुथें नं च्वं
मिखा भाय्याना सताःच्वंगु थें नं च्वं
नुगलय् छुयाय् छुमयाय् थें जुल….
जितः वं खंकाःकि गथे खः?
स्वालुसे न्ह्याय्या निखेच्वंगु नेताः
भति भति ह्याउँसे नं च्वं….
छाय् खः? यौवनया प्यालचंला मस्यू
जिगु नजरं खंगु वयागु मिखाय्
तसकं मुसकाःगु व न्हिलासु खना…
वइगु कलात्मक आकृतिया ल्हाःतं
जितः व पाखे सताःच्वंगु थेँ ताः…
पकां जितः वं क्वथिक स्वलजुइ..
अकि व गबलें उखे, गबलें थुखे
फय् नापं न्ह्यानां च्वंगु खनिदु …..।।
यौवनया फसँ गाःगु वयागु म्हुतुसिं
सर्गतय् च्वना सुलाकासा म्हितित
जित सर्गतय् सताःच्वंगु थेँ नं च्वँ
सु खः व? तसकं अजू चासें
हाकन छकः क्वथिक स्वया…
मतिनाया भावं नुगलय् छक
न्ह्यपं तिंस्वाकाः न्यनाः स्वया…
छाय् खः मस्यू….वइतः खनाः
नुगः नं जिगु भाराभार मिं……
हथाय् चाःग’ न’गलं जितः घ्वात
अलय् वहे नुगलं
व जिगुम्हे खः धकाः धाल…
नुगःयातः सुभाय् देय्छासें
नुगलय् ह्वःगु मतिनाया स्वाँ खानाः
वइगु छेँनय् छुइकेतः सना….
तर संयोगवस….
मुसुं न्हिलाः हिसि याना..
सर्गतय् जिनापं सुलाकासा म्हितितः
निभाःया जःयातः पनाः…
जितः सताःच्वंम्ह व….
नुगलय् ह्वःगु मतिनाया स्वाँ
वइगु छेँनय् छुइके मखंकं हे..
जिगु निगः नयँनं न्ह्योनि….
ग्वय् फसँ पुइका यंकल….
इत जिगु मतिना स्पर्शित याय् मखंकं हे
सदां सदांया नितिं पुइकाः यंकल
वइतः ग्वय्फसँ पुइकाः यंकल…..।।
(अगष्ट २१, सा.अफिसय्)
