गीतकार तथा कवि क्षेत्रप्रताप अधिकारीको ७२ वर्षको उमेरमा निधन भएको छ ।
दुई दिनअघि ह्दयघात भएपछि उहाँलाई गंगालाल ह्दयरोग केन्द्रमा भर्ना गरिएको र आइतबार राती अधिकारीको निधन भएको उहाँको परिवारले जनाएको छ ।
अधिकारीले लेखेका हेर आज सगरमाथा रोइरहेछ लगायतका गीत चर्चित छन । स्वरसम्राट स्वर्गिय नारायण गोपाल, बच्चु कैलाश, कुन्ती मोक्तान, गोपाल योञ्जन र रामकृष्ण ढकाल लगायतका कलाकारले अधिकारीका शव्दमा स्वर दिएका छन् ।
विक्रम् संवत् १९९९ चैतमा तनहुँ जिल्लाको मिर्लुङ गाविसको ज्यामरूक दयापानीमा जन्मिएका अधिकारीले कविता सङ्ग्रहसमेत प्रकाशित गर्नुभएको छ ।
रहर लागेर (२०२४), गामबेसीका गीत (२०३४), पहाडेखि पहाडसम्म (२०४३), नफुलेका फूलहरू (२०५३), फेरि एउटा परिवर्तन (२०५५), तर देश हारिरहेछ (२०५७), अकविता (२०५८), युद्ध र छाया (२०६४) उहाँका प्रकाशित कृतिहरू हुन् ।
उहाँका गीत तथा कविताहरूमा राष्ट्रियता, प्रकृति प्रेम, ग्रामिण समाजप्रतिको आकर्षण, युगीन बेथितिहरूको चित्रण पाइन्छ । पञ्चायतकालमा शिक्षा सहायक मन्त्रीसमेत बनेका अधिकारीका दुई छोरा छन । उहाँले बिपी कोइराला स्वास्थ्य विज्ञान प्रतिष्ठान धरानलाई शरीर दान गर्नुभएको थियो ।
(स्रोत : UNN)
