~विजय बान्तवा~
एकाएक प्रष्फुरण भयो, एकाएक विष्फोटन् भयो
ॐकार शब्द, झंकार शब्द
लहर लहर लहराउँदै, सागर सागर सुसेल्दै
संगीत-सुरमा सरगम सम्हाल्दै
अन्हद्को ध्वनि सुनेर आल्हादित बन्यो
पुलकित बन्यो मन मस्तिष्क
शून्यतामा यति विघ ध्वनिहरू गुञ्जिरहेछन्,
स्वर लहरी स्वर लहरी-
मिठासपूर्ण, मनमोहन सम्पूर्ण,
सुनेर सबै स्वरहरू
भाव विभोर भइउठ्यो,
अन्तरिक्षभरिका शब्दहरू,
केही न केही अर्थ बोकेका शब्दहरू,
केही न केही उद्देश्यमा उपस्थित अक्षरहरू
अनन्तमा मौलाइरह्यो,
अनन्तमा जागिउठ्यो,
सबै शब्दहरू नै भक्ति प्रिय,
सबै शब्दहरू नै समर्पित,
अहंकार हराएका सबै शब्दहरू,
भावालु शब्दहरू, संवेदनशील शब्दहरू,
सकारात्मक सबै शब्दहरू,
नकारात्मक विलोपित शब्दहरू,
सकारात्मक आह्लादित भावहरू,
शान्तवना र सहानुभूतिका शब्दहरू,
नकारात्मकता हटिएपछि सबै शब्दहरू नै सारयुक्त,
विवाद सबै मेटिएपछि सबै शब्दहरू नै उपहारयुक्त,
वाणीमा अमृत, मनमा सुधा,
हृदयमा पायस, मस्तिष्कमा विवेक-शक्ति,
शब्दहरूको संगति, शब्दहरूको मेला,
शब्दहरूको सप्तरंगी भेला,
शब्दहरूको अद्भूत चमत्कार,
शब्दहरूमा नै ध्वनि पनि रमाएका,
शब्दहरूको भावमा नै परिवेश उज्यालिएका,
शब्दहरूले चारैतिर रमाइला सिंगारिएका सिंहासन,
शब्दहरूले उन्मादित सजिएका सुन्दर संसार,
शब्दहरूमा नै शान्ति, सद्भावना र सहिष्णुता,
शब्दहरूमा नै पूर्वज्ञान, पूर्वाभास र सम्पूर्ण अभियान,
शब्दहरूमा नै शान्तिको आग्रह र क्रान्तिको अभियान,
शब्दकोषभरि सजिएका शब्दहरू
मौरीको भूँ भूँ संगीतबद्धतामा-
मह बनाइरहेका मीठा मीठा शब्दहरू,
उपसर्ग, प्रत्यग, विसर्ग, हलन्त, पूर्ण विराम आफै बोकेर,
मानव-संसारलाई शब्द ब्रह्याण्डले दिइरहेछ उपहार,
सागरको गहिराइबाट झिकेर मोती सरह,
बरदान,आशीर्वाद, शुभकामना सबै शब्दहरू,
मानिसलाई विजयको माला पहिराएर,
आफै अलंकृत भइरहेछ,
अभिनन्दन, अभ्यर्थना, अभिवादन, अभिव्यञ्जना अर्थिएर,
शब्दहरू अभिव्यक्तिमा ब्रह्याण्डमा जोड़िरहेछ।
शब्दले शब्दकै शुद्धीकरण खोज्दै
पर्यायवाची र अनेकार्थी रुप धारण गर्दै,
ब्रह्याण्ड र धरती क्रमश शोभायमान भइरहेछ।
विवेकको तरंगमा असल र सकारात्मक शब्दहरू,
मानव-मस्तिष्कमा भरिरहेछ, अमृतसरि घोलिरहोस् ,
शब्दहरूले सकारात्मक भाव-अर्थहरू बोलिरहेछन्।
लौकिक-धारणामा अर्थाइएका नकारात्मक शब्दहरू सबै
ब्रह्याण्डमा न्वरान गर्नु उड़िरहेछन् आज
अनि शुद्धीकरण भएर केवल
अब प्रष्फुटन यसरी नै भइरहोस् मात्र सकारात्मक अर्थहरू,
उद्देश्यात्मक लक्ष्यहरू,
शब्दहरूले यहीं चाहना र अभिलाषामा,
ब्रह्याण्ड-मण्डलमा सभा आयोजन गरेर,
शब्दको नयॉं रुपान्तर भइरहेछ,
शब्दका नयॉं भावहरू जन्माइरहेछ।
वाणी-साधनामा यी शब्दहरू,
साधु सन्त जस्तै निर्मल र चोखो हुन्,
सरस्वती देवीको वरदान र बोली बनून्,
आज भन्किरहेछ भुनुनु शब्दहरू शब्द-ब्रह्याण्डमा,
विश्वभरि अरबौं भाषाबाट रुपान्तर भएर,
ध्वनिको गति सूर्यमा प्रकाशमान भइरहेछ,
शब्दको भावहरू प्रकृतिबाट नै प्रसारित भइरहेछ।
श्रवण-शक्तिमा अब देवत्वको क्षमता बसोस्,
वाणी-शक्तिले अब शारदा माताको रुप नै धरोस्,
शब्दहरू अब मानिसका आभूषण बनून्, बनिरहून्,
भाषा मतान्तरको रुपान्तर चक्रदेखि उठेर माथि,
हृदयदेखि हृदयको भाषा बोलिरहून्,
शब्दहरू अब देउता बनेका छन्,
मात्र स्वार्थ- संसार दानव छन्।
देउता बनेका शब्दहरूले अब ब्रह्याण्डमा नै बास गर्नेछन्,
विवेकी मानव अब ब्रह्मस्वरुप शब्दहरूमा नै सत्य जीवन देख्छन्,
सद्विवेकी मानवले शब्द-ब्रह्माण्डमा नै आफ्नो सद्स्वरुप भेट्छन्,
अनि जगतीतलमा रमाइलो शब्दहरूको वर्षात् गर्छन्।
सकारात्मक शब्द र भाषा हराएकाहरू,
गलत अर्थ मात्र बताइएका जीवहरू,
अब नितान्त पाषाण बन्ने क्रममा छन्,
सबल, सशक्त र सजीव शब्दहरूमा सुशोभित मानवहरू,
अब क्रमश: दैविक शब्द लोकमा प्रवेश गरिरहेछन्, गरिरहेछन्।
(प्रकाशित पुस्तक शब्द ब्ह्माण्ड-बाट)
(स्रोत : Snowlinenews.com – Sikkim)
