~बिजु सुवेदी ‘विजय’~
धेरैजसो व्यक्तिलाई थाहा नहुन सक्छ कि काठमाण्डौंको हनुमानढोकामा अवस्थित कालभैरबको मूर्ति अलिकति हँसिलो हुनुको रहस्य केहो भनेर । यसबारे जिज्ञासा जो कोहीलाई पनि हुनु स्वाभाविक हो । कालभैरव त वीररसले भरिपूर्ण हुनुपर्ने । तर किन अलिकति हाँसेको जस्तो देखिन्छ त ?
वास्तवमा कालभैरब पहिले हँसिलो थिएन । वीररसले भरिपूर्ण भयानक थियो । कालभैरबको मूर्ति अगाडि जो कोहीले पनि त्यहाँ असत्य बक्थ्यो त्यसले रगत छादेर मर्थ्यो । त्यसैले कसैले झूठ बोल्यो भने कालभैरबकहाँ ल्याएर बकाउँदथ्यो झूठ बोलेमा रगत छादेर मर्ने कारणले गर्दा साँचो कुरा पत्ता लाग्दथ्यो ।
धेरै पहिले एकजना नामूद घुस्याहा थियो । त्यो घुस्याहाले घुस खाएको कसैले पत्ता लगाउन सक्दैनथ्यो । एकदिन घुस पत्ता लगाउने सरकारी कर्मचारीहरू मिलेर त्यस घुस्याहालाई भोलि तँलाई कालभैरबको अगाडि लगेर बकाउने भनेर भने ।
त्यो घुस्याहा आफ्नो घर फर्क्यो । आफ्नो आमालाई सबैकुरा बेलिविस्तार लायो । अनि घुस्याहाको आमाले घुस्याहालाई आफ्नो स्तन चुस्न आग्रह गरिन् । घुस्याहाले मानेन । अनि आमाले यत्ति गर्यौ भने तिमीले रगत छादेर मर्नु पर्दैन भनेर धेरै जिद्दी गरेपछि घुस्याहाले मान्यो । अनि आमाले, “सुत्न जाऊ म तिमीलाई भोलि उपाय भन्छु, अवश्य नै तिमीले कालभैरवको अगाडि बके पनि तिमीले रगत छाद्नुपर्ने छैन,” भनेर भनिन् ।
घुस्याहालाई निन्द्रा लागेन । रातभरि छटपटी भइरह्यो । आमाले ठीक हुन्छ भनेको सम्झीरह्यो । भोलिपल्ट बिहान झसिमिसेमा आमाले कुचोले कोठामा बढार्दै थिइन् अनि घुस्याहाले अब भन्नुस् न आमा भनेर भन्यो । आमाले भनिन् :- ” तिमीले बक्दाखेरी मैले अन्तिमपटक आमाको दूध चुसेको बेलादेखि अहिलेसम्म एकपटक पनि घुस खाएको छैन भनेर भन्नु ।”
घुस्याहालाई आफू आमाभन्दा निक्कै चलाख लागेको थियो । तर ऊभन्दा पनि आमा झनै चलाख भएको अब उसले ठान्यो । उसको ऊ मात्रै चलाख भन्ने घमण्ड तोडियो ।
भोलिपल्ट घुस्याहालाई बकाउन कालभैरब कहाँ लगियो । उसलाई “तैंले घुस खाएको छ कि छैन भन् !” भनेर सोधियो ।
उसले “मैले आमाको दूध चुसेको बेलादेखि अहिलेसम्म एकपटक पनि घुस खाएको छैन” भनेर भन्यो ।
उसको चलाखी देखेर उग्ररुप भएको कालभैरब पनि हाँस्न पुगे ।
भनिन्छ त्यति बेलादेखि कालभैरबकहाँ लगेर बकाउने चलन हट्यो र त्यत्तिबेलादेखि नै कालभैरबको अलिकति हाँसेको रुप भएको हो भन्ने मान्यता अद्यापी पाइन्छ ।
बिजु सुवेदी “विजय”
कुलेश्वर काठमाण्डौं
bijusubedi@hotmail.com
नोट :- मैले पहिले वाल्यकालदेखिनै यो कथा सुन्दै आएकोले र अहिले पनि टुरिस्ट गाइडहरूले कालभैरबलाई देखाउँदै यही कथा भनेको सुनेकोले गर्दा यसलाई कृतिको रुपमा प्रस्तुत गरेको हुँ । इतिहासको कुरा बङ्गाउने मेरो प्रयास होइन । इतिहासको संरक्षण गर्ने मेरो उद्देश्य हो । यसबारे दिग्गजहरूबाट अरु पनि थप जानकारीको अपेक्षा गरेको छु । केही कारणले गलत प्रस्तुतिकरण भएको भए भूलचूक क्षमाप्रार्थी छु ।
(स्रोत : Blog)
