~क्षेत्रप्रताप अधिकारी~
मलाई सञ्चो छैन तर देशलाई सञ्चो भइरहोस्
म त आउँछु जान्छु तर यो देश सधैं रहिरहोस्
मेरो देशको वरिपरि शुभ ग्रह घुमिरहुन्
यो माटोलाई घरिघरि प्रगतिले चुमिरहुन्
मेरो गति रोकिए नि कोशी कतै गइरहोस्
म त आउँछु जान्छु तर यो देश सधैं रहिरहोस्
मेरो देशको सिमानामा दैव पाले बसिरहुन्
जुनेली र किरणहरू यै माटोमा खसिरहुन
जति मर्का परे पनि यो मुटुले सहिरहोस्
म त आउँछु जान्छु तर यो देश सधैं रहिरहोस् !
मलाई सञ्चो छैन तर देशलाई सञ्चो भइरहोस्
म त आउँछु जान्छु तर यो देश सधैं रहिरहोस्
