~बूँद राना~
नौलो हाँक हालिदिने समयलाई सलाम छ
हतकडी फालिदिने समयलाई सलाम छ।
म झैँ कडा को छ? भन्ने चट्टानको चुरीफुरी
मैनझैँ पगालिदिने समयलाई सलाम छ।
बल्लबल्ल चहारेको कुलो पानी जोगाउन
मजबुत आलिदिने समयलाई सलाम छ।
सहिदको रगतको प्रतिफल सम्झाउन
क्षितिजमा लालदिने समयलाई सलाम छ।
बाँदरको हातबाट फूबारी फुत्काएर
नयाँ नौलो मालीदिने समयलाई सलाम छ।
उराठ लाग्दो धरतीमा छर्न भनी खुसीयाली
अबिरको थाली दिने समयलाई सलाम छ।
सागरका छालहरु अनगिन्ती हुँदाहुँदै
बूँदलाई पालिदिने समयलाई सलाम छ।
बारुद र बन्दुकले छियाछिया हृदयका
प्वालहरु टालिदिने समयलाई सलाम छ।
(श्रोत:- अन्तर्जाल)
