~बूँद राना~
चिराचिरा परेको छ मान्छे
‘बाँचे’ भन्दै मरेको छ मान्छे।
भेट हुन्थ्यो जहाँ भेटिँदैन
डेरा अन्तै सरेको छ मान्छे।
नर्कमा नै रमाउँछ कि के?
सुन्छु त्यतै गडेको छ मान्छे।
नाक झर्ला कि झैँ स्वास फेर्दा
सड्नु कस्तो सडेको छ मान्छे?
तान्नु केले? उठाउनु केले?
निक्कै तल झरेको छ मान्छे।
बूँद छर्की कहाँ निभ्ला ज्वाला?
भित्रभित्रै डढेको छ मान्छे।
सुन्दा लाग्ला पछाडि परेझैँ
बढ्न अघि बढेको छ मान्छे।
मासियो, सिद्धियो नभनौँ है
चढ्न चुली चढेको छ मान्छे।
(श्रोत:- अन्तर्जाल)
