~कृष्णहरि बराल~
सधैं सधैं उही कुरा लेख्ता पो त दिक्क लाग्छ
जेजे देख्नु हुन्नथ्यो त्यै देख्ता पो त दिक्क लाग्छ
धेरै कुरा पाइएन त्यो त बरू ठीकै थियो
हावा पनि तिनले तेतै छेक्ता पो त दिक्क लाग्छ
ठूलाबडा भनाउँदाले यति ठूलो धर्ती छोडी
गरिबकै शिरमाथि तेक्ता पो त दिक्क लाग्छ
यहीं सधैं हुनुपर्ने प्यारो प्रजातन्त्रलाई
दिल्ली अनि वासिङ्टनमा भेट्ता पो त दिक्क लाग्छ
(स्रोत : प्रतिनिधि नेपाली गजलहरू – गजल सङ्ग्रह – सम्पादन : ललिजन रावल)
