व्यङ्ग्य कविता : पप्पी सेम सेम

~लक्ष्मण गाम्नागे~

हाम्रा नेता अङ्कलको कति ठूलो भुँडी
भुँडी देखी वाक्क भा’छिन् उनकै घरकी बूढी ।

सुराल–साडी फेरे जस्तै अङ्कल गाडी फेर्छन्
केही भन्नु हुन्न यिनी आँखा तरी हेर्छन् ।

अघि अघि ढोके छाते पछि लाउँछन् चम्चा
जन्ताले नै दिनुपर्ने सिँगान पुछ्ने गम्छा ।

काम गर्ने बेलामा चाहिँ जहिल्यै खट पट
हाम गर्ने बेलामा चाहिँ मिल्छन् झट पट ।

तलव, भत्ता, कमिशन र घुस पनि खाए
सम्विधान ल्याउँछु भन्थे अर्की आन्टी ल्याए ।

हाम्रा नेता अङ्कलको प्वाल परेको पेट
गोबर, गिट्टी, अलकत्रा, पचाइदिन्छ जेट ।

भूत हुन् कि भूतपूर्व हुन् छुट्याउनै गाह्रो
नाङ्ग््ै छन् कि लुगा ला’छन्, खुट्याउनै साह्रो ।

लुगा लाएर आउनू अङ्कल खेलौँ फेयर गेम्
नत्र भन्छु सेम् अङ्कल पप्पी पप्पी सेम् ।

सेम् सेम् नेता अङ्कल पप्पी पप्पी सेम्
सेम् सेम् पप्पी अङ्कल पप्पी पप्पी सेम् ।

This entry was posted in कविता, हास्य - व्यङ्ग्य and tagged , , , , , . Bookmark the permalink.

Leave a Reply

Your email address will not be published. Required fields are marked *