कविता : समालोचक

~विमल निभा~Bimal Niva

इलाका प्रहरी घरको
रेकर्ड पुस्तिकामा अङ्कित छ
कविताको परिभाषा
भावनाको आवेगलाई
व्यवस्थाको प्रचलित व्याकरणमा
नियमअनुसार ढालेर
कोमल कोमल पदावलीहरु
रचना गर्नु नै
सर्वोत्तम काव्य हो
हृदयमा लँगौटी कसेर
शब्द–साधना गर्नुपर्छ
अनावश्यक तर्क गर्नुहुन्न
र मस्तिष्कलाई च्यापेर मुठीमा
बेस्सरी
सिर्जनाको जगत्मा
सुस्तरी ओर्लनुपर्छ
यही काव्य–व्यवहार हो
दायाँबाट हिँड
टोपीलाई चिन
शान्तिको पाठ पढ
र स्वागतका लागि एक पङ्क्तिमा
शिर निहुराएर उभिऊ
सर्व कर्म सिलसिलाबद्ध रुपले गर
अनि कलम समाऊ
प्रिय कविज्यूहरु
तर आजका कविहरु
किन पटक पटक
काव्यानुशासनको उल्लङ्घन गर्छन् ?
ठानाका पुलिस इन्सपेक्टर साहेब
आश्चर्यचकित छन्
र अत्याधिक क्रुद्ध पनि

(२०५१)

This entry was posted in कविता and tagged , , , , . Bookmark the permalink.

Leave a Reply

Your email address will not be published. Required fields are marked *