कविता : निद्रा नलागेको रात

~गणेश खड्का~Ganesh Khadka

सुतेपछि राति निदाउन भनेर
निद्रा नै लागेन भने पो फसाद पर्दो हो कसै-कसैलाई
त्यो रातको मुख्य काम पनि त भएन निद्रै नलागेपछि
निद्रा नलागेको रात –
रङ्ग-रङ्ग प्रवृत्तिका मान्छेहरु के गर्दा हुन् ?

चोर-डाकाहरु निदाएनन् भने ,
कि धेरै चोरी-डकैती गरेको धनमाल गनेर रात बिताउँदा हुन्
कि चोर्नै नपाएर सुक्खा लागेको
रित्तो रातलाई धारे हात लाउँदा हुन्
र, भावी चोरी-डकैतीका निम्ती फरक-फरक योजना बुन्दा हुन् l

लुटेरा-ठगहरुलाई निद्रा नलाग्दा,
भोलि कुन मुर्गालाई ठगेर थाङ्नामा सुताउने
अनि त्यही ठगीको पैसाले ट्वान्टी फोर आवर्स चल्ने
नाङ्गा डान्स बार,डिस्को थेक र क्याबिन रेस्टुरेन्टमा
टिप्स दिएर गराउने अम्मल लागिसकेको
हस्तमैथुन सम्झेर रोमान्चित हुँदा हुन् l

घुसखोर कर्मचारीलाई निद्रा लागेन भने,
कार्यालयमा आएका घुस नखुवाउने सेवाग्राहीहरुलाई सराप्दै
अब कुन उपायले श्रीमतीलाई
लेटेस्ट मोडेलको गहना किनिदिने
अनि कसरी बैना गरिसकेको
नयाँ घर-जग्गा जोड्ने भनेर पिरोलिंदा हुन् l

भ्रष्टाचारी नेताहरु निदाउन सकेनन् भने,
चुनावमा भोट किन्दा लागेको खर्च उठाउने ध्याउन्नमा
देश कसरी डुबाउने,
जनतालाई कस्तो खालको सास्ती दिने
कुन काण्ड मच्चाउने भ्रष्टाचारको
र बिदेशी बैंक भर्ने कल्पिंदा हुन् l

कुनै पेशेवर वेश्यालाई निद्रा आएन भने
कि ग्राहक नै नपाएर खडेरी लागेको मन रूँदो हो
कि अधिक ग्राहक थाम्न नसक्दाको पीडा दुख्दो हो l

निद्रा नलागेको रात धेरैले अनेकानेक सोच्दा हुन्
बिद्दार्थी,व्यापारी,किसान,मजदुर,
वकिल,पत्रकार,कलाकार,समाजसेवी, आदि-इत्यादि…
मान्छे मात्र होइन, पशु-पन्छी र जीव-जन्तुले पनि निद्रा नलाग्दा
के-के सोच्दै छट्पटाउँदा हुन् आ-आफ्नै कर्म,धर्म र पेशाअनुसार
तर, एउटा कविलाई निद्रा नलागेको रात
सारै पट्यारलाग्दो,लम्बेतान र बोझिल हुँदोरहेछ
केहि सोच्न,कल्पिन,गम्न,योजना बनाउन र गर्न नसक्दोरहेछ
सिर्फ एउटा अनिदो कविता फुराउनु बाहेक l
ooo

( कविता सङ्ग्रह : ” हिउँले आगो पगालेर ” बाट l )

भोजपुर
हाल : फ्रिगेट आइल्याण्ड ( सेसेल्स )

(स्रोत : रचनाकारको फेसबुकबाट सभार)

This entry was posted in कविता and tagged . Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.