थारू भाषी छन्द कविता : कहाँगिल अगहनिया नेन्धर ?

~लक्की चाैधरी~

छन्द : सवाई 

कहाँगिल अगहन, थारुनके रीति ?
हेरागिल हेर्तीहेर्ती, नेन्धरके मिति ??
भुलेलग्ली संसकृति, हेर्तीहेर्ती हम्रे ।
धेरजन्ना होकेहोकी, नैसेकली सम्ह्रे ।।१।।

ढिक्रीबेचे जाइदुल्ही नातनके घर ।
निसफिक्री होकेबैठी नैरहिन डर ।।
सबओर स्वतन्त्रता मनलग्ना दिन ।
इच्छाभर ढिक्रीबेची नैरहिन ऋन ।।२।।

फागुनमे भोजकरी अगहनमे दुल्हा ।
दुल्हनिया चलगिली नैबरल चुल्हा ।।
अस्रालग्ना मायासँच्ना दुलहक पाला ।
दुल्हनिया बट्याहेरी नेन्धरके माला ।।३।।

मायाप्रेम चोखारहे सुहाउन लग्ना ।
आजहस कहाँरहे देख्तीदेख्ती ठग्ना ।।
दुल्हाकरैं धेरमाया दुल्हनिया पाके ।
दुल्हनिया खुशीहुई दुल्हकथे जाके ।।४।।

दाइबाबा खुशीहोके पतोहिया लन्थैं ।
दुल्हाजुन मनमने अंग्रीधेर गन्थैं ।।
फागुनमे भोजकर्ना अगहन्के अस्या ।
हेरेपर्ना दुल्हादुल्ही नौमहिना बट्या ।।५।।

सवाई छन्द (४ + ४ + ४ + २ = १४ अक्षर)

(साभार – ‘नेन्धर’ कविता संग्रह – २०७१)

  •  
  •  
  •  
  •  
  •  
  •  
  •  
  •  
  •  
  •  
  •  
This entry was posted in छन्द कविता, थारू कविता and tagged . Bookmark the permalink.

Leave a Reply

Your email address will not be published. Required fields are marked *