कविता : जमिनमुनिका पर्खालहरु

~विजय योजीत~Bijaya Yojit

उ पर्खीरहेछ
सधैं झैँ उसैगरी ,
अँध्यारोको व्यग्र प्रतिक्षा छ उसलाई
र झुकेको छ चुपचाप
पिपलका जराहरु समाएर
सधैं झैं घामको नकाब लगाएर ,
सधैं झैं सन्ध्याको धारिलो गैंती टेकेर ,
त्यहि पुरानो पर्खालको आडमा !

प्रहर-प्रहरको हेक्का छ उसलाई
पछाडी फर्किएर हेर्दा ,
निमेष- निमेष नाप्न सक्छ उसले ,
आफ्ना अग्लिएका छायाँहरु देख्दा ,
अनि मुस्काउछ आफ्ना स्वविवेक र
कुटिल चेतनाहरु संग ,
सोच्छ ,
लैजान्छु आज फेरी
केहि इँटाहरु निकालेर ,
निदाएका बस्तीहरुबाट ,
भात्काउछु केहि भरोसाका शृंखलाहरु ,
बस्तीहरुकै सपनाहरुबाट !

जब उज्यालोले हार्दै जान्छ ,
र अँध्यारोले जित्दै जान्छ ,
उ नकाब उतार्छ र हेर्छ ,
त्यै अग्लो पर्खालमा !

दृष्टि बिनाका आँखाहरु अंकित
शान्त अनुहार ,
अग्ला अग्ला चिसा नितम्बहरु ,
पारदर्सी भएर बगेका ,
सङ्लो रगतका नसाहरु ,
जब जब बिलाउँछ उत्तरार्ध झैँ भएर
प्रहर प्रहर रातको गर्भभित्र ,
जन्मिन्छ त्यै पुरानो पर्खालको पारीपट्टी
यौटा बालक झैँ बृद्ध ,
ससक्त झैँ असक्त ,
र लत्रिन्छन् या पल्किन्छ्न ,
हातहरु उचाइबाट अवतरण रोजेर ,
वा उसैलाई खोजेर ,
त्यहि पुरानो पर्खालको आडमा !

अब उ
बिस्तारै यौटा झोलाबाट ,
निकाल्छ केहि नुनका पोकाहरु ,
केहि केहि दाल चामलका पोकाहरु
केहि तरलताले भरिएका डब्बाहरु !

र अग्लिन्छ उ यसरि ,
सिसिफस हरुको बस्तीमा भीमकाय भएर ,
या भिमसेनको अघिल्तिरै घोटत्चक भएर ,
हो फयाक्छ अब उसले ,
फेरी केहि पोकाहरु ,
बदलामा उप्काउछ
आँखाहरुबाटै केहि इँटाहरु ,
र फेरी फयाक्छ पोकाहरु ,
बदलामा टेक्छ शितल नितम्बहरु ,
अनि केहि डब्बाहरु थमाउँछ ,
थरथर कापेर थापिएका हातहरुमा
र बदलामा पिउँछ ,
धित मरुन्जेल नशाहरु …..!!

हो बस्तीहरु
निदाइरहेका छन ,निदाइरहुन् बस्तीहरु ,
न ब्युझिउन बस्तीहरु ,
यहि चाहाना छ उसको र लेखियोस यौटा कहानी ,
मेरो आँगन उचालेर बसेका छन् ,
” जमिनमुनिका पर्खालहरु ” !

– विजय याेजीत ,

(स्रोत : पल्लव साहित्य प्रतिष्ठान)

About Sahitya - sangrahalaya

We will try to publish as much literary work of different authors collected from different sources. All of these work is not used for our profit . All the creative work belongs to their respective authors and publication. If requested by the user we will promptly remove the article from the website.
This entry was posted in कविता and tagged . Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.