कविता : नयाँ नेपाल

~ओमप्रसाद घायल~Om Prasad Ghayal

माथिल्लो सदनमा
भर्खरै सकिएको छ तिम्रो सम्बोधन
बडो मिठोगरि आफ्नो शब्दसामथ्र्यले
देशबासीका नाममा तिमीले दिएको मधुर अभिव्यक्ति
र सुन्दर, शान्त र सार्वभौम नेपालको मार्गचित्र
मलाई किन लागिरहेकोछ
बाल्यकालमा मैले मेरी हजुरआमाबाट सुनेको ‘दन्त्यकथा’जस्तो ।

किनकि राजनीतिशास्त्रका आधारमा
तिमीले भर्खरै सुनाएको
नयाँ नेपालको इतिवृत्तान्त सकिन नपाउँदै
बोक्सीको अभियोगमा
त्यही पारि गाउँको एक विधवा महिलालाई
जवर्जस्ती खुवाइएको छ–मानव दिसा
र त्यही गाउँमा
कथित उपल्लो जातीको चियाको गिलास छोएको नाममा
एक दलित बालकमाथि भएको छ आक्रमण
त्यसका साथै
ब्राह्मणको छोरीसँग प्रेम विवाह गर्ने
एक दमाइ युवकलाई बलत्कारको झुट्टा अभियोगमा
आजै थुनाइएको छ प्रहरी चौकीमा ।

सायद
तिमीले पढ्यौ कि पढेनौ अखवारमा
स्कुलबाट घर फर्कने क्रममा
आधादर्जन चूल्ठेमुन्द्रेहरुबाट
एउटी १३ बर्षे बालिकामाथि
पालैपालो भएको छ
क्रुर र पासविक बलत्कार ।
र तिमीले भनेकै नयाँ नेपालमा
आफ्नै छोराको हत्याको न्यायको लागि
सरकारसँग याचनारत एक वृद्धको
अनसनस्थलमै उडेको छ प्राणपखेरु ।

विडम्बना
अझै बलिरहेको छ यही सडकमा आगो
परपरसम्म उडेको छ टायरको विकृत धूँवा
र जनताको सपना पुरा गर्ने कसम खाएर
माथिल्लो सदनमा पुगेका तिमीहरुवीच
अझै मिलेको छैन कुर्सीको भागबन्डा
त्यसैमा उत्पन्न भएको छ हातहालको स्थिति
भाँचिएको छ माइक्रोफोन र क्षेतिग्रस्त भएको छ रोष्टम ।

उता बाढीले घरबासविहीन भएकाहरु
राहत नपाएर रोइरहेका छन् तिम्रो सदनतिर फर्केर
र घरबाट लत्याइएका ज्येष्ठ नागरिकहरु
आफ्नो बुढ्यौली जिन्दगीको सुरक्षाका लागि
तिमीतिरै फर्केर गरिरहेका छन् हारगुहार ।
तर यहीवीचमा
तिमी प्रत्येकदिन रेडियो र टेलिभिजनबाट
गरिरहेका छौ भद्दा भाषण
र सुनाइरहेका छौ नयाँ नेपालका ‘तिलस्मी कथाहरु’
यसरीनै बर्षौदेखि
देशलाई ढाँटेर उठाएको तिम्रो कद
अब विस्तारै देखिन थालेको छ झन्झन् पुड्को
फेरिएको छ तिम्रो अनुहारको रङ
नागरिक समुदायको वीचबाट
हराउँदैछ तिम्रो पाखण्डी लोकप्रियता ।

आफैलाई र आफू उभिएको माटोकाप्रति
तिमीले गरेको वेइमानको
क्षमा याचना गर प्रिय मानव
र आफूलाई रुपमान्तरण गर
मानव सभ्यताको नयाँ आयाममा,
किनकि देशलाई ढाँट्नेहरुका विरुद्धमा
निर्माण भइरहेको छ यतिखेर नागरिकमोर्चा
उठिरहेको छ अब मानवसागर ।

(स्रोत : रचनाकार स्वयंले ‘Kritisangraha@gmail.com’मा पठाईएको । )

About Sahitya - sangrahalaya

We will try to publish as much literary work of different authors collected from different sources. All of these work is not used for our profit . All the creative work belongs to their respective authors and publication. If requested by the user we will promptly remove the article from the website.
This entry was posted in कविता and tagged . Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.